W takim wielkim śniegu to naganiacze musieli na nartach lotać, bo przeca po nogach to by sie za wiela tych krzokow niy przeleciało. To tyż krom tych pora złotkow, co nom myśliwce dali na koniec gonu, mieli my tyż sposobność nauczyć sie dużo feszterskich knifow i usłyszeć niyjedna opowiostka. Najbardzij mie szpanowały te jejich powiarki przi fojerce, jak liczyli ustrzelone zajonce, lisy i fazany, a że fesztry i wyndkorze, to dycko prziczyniajom wszystko, to tymtuplym sie uszy szpicowało. Śmiychu tyż było, jak myśliwce czynstowali sznapsym jakigo gościa zaproszonego na gon, a łon wzion kieliszek prawom rynkom i wypiył, bo musioł wtedy postawic nastympno flaszka. Dowiedzioł żech sie tyż, że myśliwce som fest przesondne i wierzom w rostoliczne czary. Jak sie wybiyro taki myśliwiec na gon, to nigdy mu niy trza życzyć udanego gonu, ustrzelynio najwiyncyj zajoncow, najlepszego lisa, sornika, czy tyż jelynia, bo po takich życzyniach kożdy myśliwiec by nojchyntnij wrociył sie dudom, i powiesiył flinta na gwoździu, bo wiy, że ani cilipa niy ustrzeli, a co dopiyro fazana, abo jakigo „kota”. Na nos myśliwych czeko jeszcze wiela inkszejszych nieszczynść – padoł mi jedyn znajomy goniorz pora dni tymu – tak na przikłod jak spotkomy abo jakoś zakonnica, abo farorza we sutannie, abo nawet jakoś baba co mo na głowie i we włosach wiklery, abo baba z mietłom w gorści – moj Boże wtedy mazej bracie nazod, bo nieszczyńscie gotowe. Ale jest jeszcze jedno wielgachne nieszczyńście, kere cie może spotkać, jak idziesz abo jedziesz kołym abo autokym na polowanie i przez szosyjo przeleci ci take paskudztwo, jakim może yno być blank czorny kot, bo wtedy jest feszter załatwiony na amyn. Toż pamiyntejcie, że jak na drodze treficie myśliwca z flintom na plecach, to życzcie mu zatkanio lufy abo mokrego prochu, abo zwyczajnie powiydzcie mu taki feszterski pozdrowiynie „Darz bór”. Z czornych rzeczy, kere może mu szczyńści prziniyść, to jedynie spotkać kuminiorza w cylindrze i w czornym ancugu. Jest tyż szczyńści, jak sie trefi wesele na drodze. Najwiynksze szczyńści mo myśliwiec bezmała, jak mu sie udo ujrzeć piykne, babski kolanka. Jak mi padoł znajomy feszter, że chocioż ani czornego kota niy trefiył, ale uwidzioł kolanko, to niyroz londowoł w prykolu i o polowaniu w tyn dziyń już niy myśloł.
Komentarze