– Mom do wos zagadka starziku, powiydzcie mi, kery miesionc jest najkrotszy?
– No dyć przeca luty, kery sie nom chneda skończy, bo mo yno 28 dni.
– Psinco prowda, bo maj, kery mo yno trzi litery – śmioł sie ze starzika wnuczek Danielek.
– Kiej żeś taki przemondrzały, toż odpowiydz mi na moji zagadki – podropoł sie starzik Francik po glacy i godo:
– Jak długo zajonc do lasa leci?
– No aże doleci myśla, chyba że go przed tym feszter zastrzeli.
– Widza, że poradzisz snochwiać, ale rozchodzi sie o to, że yno do połowy lasa zajonc leci do niego, bo dalij to już leci z lasa. Ale żeś taki szprytny, powiydz jeszcze, jakich kamiyni jest nojwiyncyj w rzyce?
– Ale tyż ciynżko zagadka, przeca kożdy bajtel wom powiy, że okrongłych kizlokow. Przeca sami żeście mi kiejsik godali, że ich za bajtla zbiyrali w rzyce, żeby se ze szlojdra postrzylać do flaszek.
– Widzisz, zaś niy wiysz, bo tego na tym twojim kompurtku niy znojdziesz w internecie. Toż musza ci pedzieć, że mokrych kamiyni jest nojwiyncyj w rzyce. Dobra, już cie dalij niy byda mynczył, ostatnio zagadka:
– Jakich stromow jest nojwiyncyj w lesie?
– Dyć to kożdy wiy starziku, że sosnow, bo styknie yno sie na nasz las podziwać.
– Widzisz mondralo! Jak ześ sie chachnył, przeca nojwiyncyj jest okrongłych, bo jeszcze żech niy trefiył takigo stroma, co by był kanciaty.
– Ale żeście mie nabrali starziku, ale możno chneda bydom taki rosły w lasach, bo w dzisiejszych czasach jest wszystko możliwe. Bezmała już kańś rosnom zimioki bez skorki i styknie ich yno opłokać i bez szkrobanio do garca wciepać.
– No ja synku, możno mosz prawie, bo porzond coś z tymi gynami kombinujom, to tyż możno wynojdom jako metoda, że już bydom rosły taki kanciate świyrki i sośniczki. Niy trza bydzie wtedy na tartak jechać po kancioki. Pojedziesz do fesztra i kupisz na wiyńźba pora kubikow kanciatego świyrka bez kory i pora kubikow desek bez liści, kere rosnom w tym nowym szlagu. Biydne bydom tartaki i gatry, bo niy bydom mieli roboty, wszystko już bydzie rosło na miara w lasach. Najgorzij zaś ptokom, bo kaj bydom gniozda robić, jak astow tyż niy bydzie na takich stromach.
– Ale my sie rozfechtowali starziku, pra? Przi tych zagadkach idzie sie bele czego dowiedzieć.
– No ja synku, dzisioj już we wszystko uwierza, przeca to, co sie w mojim życiu i na mojich łoczach już porobiyło, tego by mój starzik niygdy niy spokopiył.
Komentarze