Niy wszyjscy wiedzom, że to skuli mrozu sie je maluje na bioło. Godoł mi jedyn znajomy, że to skuli chrobokow stromy maluje wopnym i śmioł sie sy mie, jak żech mu to chcioł wytuplikować. Tak jak żech niydowno napisoł, ta zima jest latoś „śmiyszno”, bo chocioż trocha nom śniegiym posypała, to jednak kole łońskij ni może se stanyć. Stromy w zegrodach już ponczki puszczajom i niy dej Boże, żeby jaki wiynkszy mroz prziszoł, bo może owocu niy być. Sikorki już uwijajom sie na stromach i ćwiyrkajom jak kożdyj wiosny: „Widzi Pon! Widzi Pon!”, bo przeca łone tyż poradzom do nos godać, yno udowomy nikedy, że tego niy rozumiymy. Toż pamiyntejcie im powiesić w zegrodzie chocioż jedyn kadłubek, one sie wom za to stokrotnie odpłacom. Powyzbiyrajom wszystki chroboki i gonsiony ze stromow. Ale pamiyntejcie, że ta dziura ni może mieć wiyncyj jak 3 cyntymetry, bo jak bydzie wiynkszo, to sie cilipy w nim zagniożdżom. Sikorki modraszki to nawet poradzom przez dwaipołcyntymetrowo dziura przelyźć, a bogatka musi mieć 28-30 mm. W telewizorze i gazetach głośno teraz o tym, że płonki som bardzo zdrowe i trza nojmynij z dwa jabka dziynnie zjeść. Pomogo to we wszystkim i bezmała prociw rakowi, jak najnowsze badania wykozały. Najważniyjsze, że płonki pomogajom w dobrym trowiyniu i obniżajom cholesterol we krwi. Najzdrowsze jednak som taki owoce, kere niy som wcale żodnom chymiom pyrskane i pamiyntom jak mój śp. ujec, kery miyszkoł w Nimcach i jak tukej przijechoł, to yno zbiyroł chrobawe jabka, bo padoł, że taki som najzdrowsze. Teraz widza, że mioł recht i już downo żech powycinoł te stromy, kere som mało odporne na rostoliczne grziby i zgnilizna. Mom yno pora stromow, ale take, że im styknom yno sikorki, żeby chroboki zbiyrały, a pyrskać ich niy trza. Prowda, że jednak czyńść zgnije i opadnom, ale te, co zostanom na stromach, som zdrowe i styknie ich na cołko zima. Kiedyś, jak żech był łeboniym, niy pamiyntom, żeby kery pyrskoł stromy. Teraz odmianow jest mocka i z wyglondu som piykniejsze te jabka, ale trza ich chymiom czynstować, a to wiadomo, że dycko ta trucizna w sobie bydom miały. Toż dbejcie o te swoji kosztele, antonowki, augustki i rynety, bo kożde zjedzone zdrowe jabko to tak, choby aptykorzowi złotek z kapsy wylecioł.
Komentarze