Wspomniało sie ji, że mo w pywnicy jeszcze dwie krauzy apfelmusu, toż gibko uznała, że zrobi babka, kero nojlepij smakuje najmłodszymu ziyńciowi. Sama niy wiy czymu, ale tymu najmłodszymu ziyńciowi, chocioż to „gorol”, najbardzij przaje. Tak dycko chwoli wszystko, co łona zrobi, i mlasko przi tym i mniam, mniam, yno godo, że wszystko pod niego szykuje. Jej stary, Alojz, nigdy niy poradziył jom pokwolić, chocioż ulybiała mu ze wszystkim od samego weselo. Teraz by mu pedziała, żeby zaszoł do pywnice po krauza tego apfelmusu, ale gizd stary rozsiod sie przed telewizorym w swojim zeslu, bo za pora minut mo być mecz Bayernu z Realym, toż go niy bydzie szterować.
Sama ślazła do pywnice, bo jezderkusie chocioż żodnymu, ale tymu najmłodszymu ziyńcioszkowi musi tyn jabłecznik upiyc.
Otwarła dźwiyrze do tyj pywnice, kaj mo fachy – tela jednak Alojz porobiył, ale dopiyro jak na pynzyjo sie dostoł – z wszystkimi krauzami kompotu i marmeladami, kere bez lato zrobiyła. Przeca dycko musi zaprawiać kompoty, bo Alojz bez kompotu niy poradzi obiadu zjeść.
Jak szkyrtła szaltrym, blyskło yno i po fertiku, byrna sie rozleciała na drobne ograbki a łona stoji oślepiono i trzimie sie ściany. Ćma jak diobli i yno w oczach ji gwiozdki migajom. Łoroz słyszy jakiś larmo choby keryś palcami po proznyj kruzie klupoł, ale to tak głośno, aże przez uszy szło.
Piyrsze, co pomyślała, że jakiś złodziyj wloz bez okiynko, ale przeca bez te sztoby żodyn by niy wloz. Serce ji zaczło walić jak młotek jeszcze gibcij niż tyn „ktoś” po tyj proznyj krauzie. To ni może być żodyn złodziyj, to kto? Jedna myśl; duchy abo jaki beboki…!
A prawie sie ji w nocy śniło o starce, że downo na kerchowie niy była z kwiotkami – to na pewno jom straszy. Po umacku otworziła jakoś dźwiyrze i dostała sie do gonka, kaj już było jasno. Szła na wiyrch po schodach i czuła, że za chwila padnie, bo nogi jakoś choby z waty.
Jak jom Alojz ujrzoł cołko blado i rozświyrgotano, to sie som zlynknył.
Straszy w pywnicy…! Byrna pynkła…! Ktoś tam klupie po krauzach…! Tela wystynkała i legła na zofa.
Alojz wzion taszynlampa i zaszoł do tyj pywnicy. Rychtyk cos klupało. Puściył szajn na fach, a tam w proznyj krauzie piyńciolitrowyj, kero po starce jeszcze została, tako z rantym na celofan, mało mysz loce jak gupio dookoła i cisnie przed sobom orzech włoski, kery tyż musioł wpadnyć do krauzy wroz śniom z wiyrchnigo fachu.
Maryjka jednak prziszła do sia i tyn jabłecznik upiykła. Co sie niy robi dlo najmłodszego ziyńcia, chocioż to „gorol”, ale oswojony.
Komentarze