Zista

– Stowej chopie, bo ci słoneczko pod pierzina zaglondo, a ty sie niy ruszosz, jakoś sie łostatnio zgniyły zrobiył. Idź wypuścić kury i prziniyś wszystki jajca z kurnika. Stanik mo urodziny i obiecała żech Elzie ukryncić zista, bo łonyj sie nigdy niy udowo. Nasze kury po trowie chodzom i żołtka som aż czerwone, to i zista mo piykno żołto farba. Z tych kupnych jajec to kożdo babka wyglondo blado i dycko sie zapadnie w piecu.
– Zaroz stowom… Co za zmierzło baba, pospać dłużyj niy do, tak ani bych musioł na szychta iść. Kiedy sie mom wyspać? Skorani boskie z tom babom. Jak żech do roboty chodziył, toś mie nazod do łożka ciongła, a potym bez śniodanio żech musioł gnać. Teraz na pynzyji mog bych se z tobom poleżeć, to mie wyganiosz. Już tam dobrze starzik godoł, że baba to dioboł stworził, dycko opacznie wszystko pojmuje.
Zaszoł Alojz do chlywika i z daleka widzi pełno piyrzo przed łokiynkiym z kurnika. Wloz do pojstrzodka i za łeb sie chyciył. Pełno wszyndzi kurskigo piyrzo na ziymi, a w gnioździe zamiast jajec smarzonka. Po kurach ni ma śladu, cicho jak makiym zasioł. Jedne jajco obstoło całe, ale uciaprane od żołtek i resztek szupin z inkszych jajec.
– No ja, Maryjka mie zabije, jak i to powiym. Przeca sie niy moga prziznać, że zaś żech wczoraj okiynko zostawiył otwarte.
Wzion gibko zawrził okiynko, a potym sztechowka do rynki i podkop do chlywika zrobiył. Całe szczyńści, że w jednym rogu w kurniku niy było już downo betonu, bo kury go wydziobały. Co to tam zresztom był za beton, jak tyn kurnik sztyrdziyści lot tymu stawioł, to cymynt był na przidział. Doł wtedy łopata na kara piosku.
I tak sie cołki spociył przi tym podkopowaniu, ale poznać niy szło, że to ni ma od lisa robota, nawet packi odcisnył małym palcym i patykiym po pazurach dziurki niy zapomnioł porobić. Wzion te obkidane jajco i już na placu larmuje, co to za niyszczyńści ich spotkało.
– Maryjko! Lis tyn gizd zatracony wszystkie siedym kur nom wynios. Musza iść do urzyndu odgłosić. Przeca łoński rok przi tyj gripie żech ich zgłosiył.
– Co ty to za gupoty godosz? Co mo kursko gripa do twojij sklerozy? Na pewno żeś zaś okiynka niy zawrził na noc. Teraz lotej po wsi za jajcami, bo z jednego jajca zisty niy zrobia.
Poszła potym Maryjka do chlywika pobadać, co sie tam stało. Widzi okiynko zawrzyte i wielko hołda piosku pod nim, a kole nij dziura jak diobli aże do chlywika. Wlazła do kurnika i widzi cały tyn bajzel, a kole dźwiyrzy stoji sztechowka cołko od świyżyj ziymi uciaprano. Zaroz wiedziała „gupio baba”, jaki tyn Alojz jest „mondry”.