Bojki o złotych rybkach wszyjscy my już słyszeli i to roztomajnte. Zawsze z nich wyniko, jaki to człowiek jest łapczywy i nigdy ni mo dość. Życie jednak pokazuje, że tych normalnych rybek jest coroz to mynij, a co tu godać o tych złotych.
Wiosnom kwiotki kwitnom, trowka sie zielyni, a w rzyczkach i przikopkach budzi sie życie. Żaby szpacyrujom od łonki do stawu, żeby tam swój skrzek robić, boczonie ich szterujom, a auta rozjyżdżajom na placek. Przeca żaby ni majom nic do szukanio na asfalcie, niych sie po łonce skoczom – powiy niyjedyn i dalij kombinuje, kaj zaś jako obwodnica zrobić, żeby bliżyj było do „końca świata”.
Kurczom sie nom te zielone teryny coroz bardzij, a rzyki coroz czyńścij przipominajom szambo, chocioż oczyszczalni coroz wiyncyj. Niy umia sie nadziwić, czamu sie tak dzieje. Przeca to ni może tak być. Niby wszystko teraz, co ludzie zapaskudzom, idzie do kanalizacje i do oczyszczalnie, a w rzykach zamiast wody leci jakoś smierdzonco bryja. Piyrwyj niy było żodnych oczyszczalni, haźle stoły za stodołom i przi kożdym gospodarstwie był gnojok i wszystko szło do ziymie. Trocha dalij od gnojoka była studnia, a woda w nij czysto i smaczno. Za płotym bez łonka leciała przikopka z czystom wodom, w keryj szpluchały sie linki i karasie z ruzikami, żaby zielone, a po dnie szpacyrowały raki taki wielnoskie jak chopsko rynka.
Nasza Ruda i Nocyna były pełne ryb i rakow, a w wodzie kompały sie dziecka. Jo som sie nauczył w Rudzie pływać i piyrsze ryby tyż w tyj rzyce żech chytoł na zwykły kij lyskowy, dratwa i hoczyk ze zicherki zrobiony. Uciecha było z mostu podziwać sie na podwodne szlajery z czystych zielonych roślin wodnych, jak ruszane prondym wody odkrywajom stojonce pod nimi szczuki i inksze wiynksze ryby. Małe rybki taki jak ruziki i wajski całymi ławicami ścieliły pofalowane choby rompla pioskowe dno rzyki. Kaj sie to wszystko podzioło? Wyndkorzym żech tyż był od dziecka i niy tak downo jeszcze chytoł żech ryby na gzelskich stawach. Niyroz żech myśloł o chycyniu złotyj rybki, keryj bych życi darowoł za to, żeby prziwrociyło sie to wszystko, co pamiyntom z tamtych lot, ale ni mioł żech szczyńscio jom chycić.
Przestoł żech wyndkować, jak wymyślili ksiyngowanie kożdyj chyconyj rybki i namnożyło sie tela kontrolerow, że jeszcze wyndki niy wyciongnył a już trza było dokumyntacjo pokazować, a potym wachowali te miłośniki przirody, żeby rybkom krziwdy niy zrobić. Trza jom było po chycyniu na konsku foli kłaść przi mierzyniu, żeby sie niy pokalyczyła od kamykow i trowy. Potym ci sami miłośnicy wciepowali sztomle z cigaretow do wody, tak ani by niy wiedzieli, że jedyn sztomel poradzi zatruć kubik czystyj wody. I czym tu tako złoto rybka mo dychać…?
Komentarze