Ale żech sie znerwowoł, jak żech sie dowiedzioł o tym browarskim kuminie, kery bezmała chcom rozebrać. Przeca tak ni może być, żeby wszystko łobulić i nowe stawiać, a już najgorzij niy liczyć sie z ludziami tukej urodzonymi. Przeca tyn kumin browarski przipomino, że Rybnik był znany z dobrego piwa na cołkim Ślonsku.
Piyrszy browar w Rybniku wystawiyli już w XIII wieku, a tyn, przi kerym stanył kumin, o kerym godka, wybudowali w 1880 roku i należoł do niyjakigo Hermana Millera. Dopiyro w 1936 roku właścicielami rybnickigo browaru stała sie Społka Browary Rybnickie. Po wojnie zostoł upaństwowiony i od roku 1951 przejyny go zakłady piwowarski ze Zobrzo.
Kumin browarski stoł sie do rybniczan symbolym, kery wrył sie głymboko w nasze życie. Moja starka mi niyroz opowiadała, jak to młodzi umawiali sie pod kuminym, bo tam kożdy trefiył bez żodnych ceregeli. Tak tyż to jeji siostra Margiyta dycko sie umowiała w tym miyjscu na spotkani ze synkiym z Orzeszo, z kerym szła potym do kina Apollo.
Za staryj Polski kumin browarski stoł sie miejscym zarobkowym dlo rybnickigo elwra, kery miyszkoł w dzielnicy Maroko, a znali go wszyjscy pod mianym Harypil. Pisoł żech już o nim pora lot tymu, kiedy jeszcze żodyn ni mioł zamiaru tego naszego kumina obulić. Przipomna yno tym, co tego niy czytali, że Harypil wypion sie dycko na browarski kumin i robiył tam na wiyrchu rostomajnte konsztiki. Nojprzod symnył szakiet i czopka, powiesiył na blitzablajtrze, a potym chodziył na rynkach naokoło tyj dziury w kuminie abo tańczył z ciyniym. Pod kuminym zbiyrało sie mocka ludzi, kerzi klaskali z dźwignytymi do nieba głowami, a potym ciepali drobnioki do czopki, kero Harypil z wiyrchu ściepowoł na tretułar. Szoł potym do szynku „Pod złotom rybkom” i stawioł piwo kamratom elwrom, kerzi wachowali czopki z drobniokami. Czynsto jednak przi czopce czekali na Harypila granatowe policjanty i brali go do ciupy, ale łon se z tego nic niy robiył i na drugi dziyń prosto z haresztu zaś szoł pokazować konsztiki na kuminie. Fifek, kery mioł sklep kolonialny naprociw kumina, niyroz pyrtulka doł Harypilowi, żeby zaś na kumin wyloz, bo mioł zaroz wiynkszy utarg na lemuniadach i sobczykowych bombonach. Jeszcze po wojnie Harypil właziył na kumin, ale ludzie sami mieli biyda, totyż niy bardzo mu sie to opłacało i słuch po nim zaginył.
Pamiyntom jeszcze, że w latach piyńćdziesiontych, jak żech chodziył do technikum, to jak my szli na strzelnica ku stadionie z całom klasom, to my stowali pod tym kuminym i wszyjscy sie do gory dziwali i udowali, że ktoś tam chodzi. Mieli my uciecha, jak przechodnie stowali i tyż sie do gory dziwali z nami.
Niy! Kumin musi dalij stoć w tym miejscu i przipominać downe czasy.
Komentarze