Grofce sie spodobało, że tako robotno ta dziywka i godo: toż dejcie mi ta cera, wezna jom do zomku, bo mom colko komnata lnu a ni mo go kto uprzyńdzić. Jo bych se tako robotno niywiasta życzyła do mojigo synka i jak cołki tyn lyn uprzyńdzie, zrobia im huczne wesele.
Wdowa była rada, że sie lyniwyj cery z chałupy pozbydzie i zaroz sie zgodziyła, jeszcze jom oblykła w najlepszy swój klajd.
Jak przijechali do Wiydnia, zaroz Julki zakludziyła do tyj wielkij komnaty pełnyj lnu. Postawiła ji kołowrotek i kozała przyndnyć. Za pora dni prziszła grofka obejrzeć, wiela już roboty zrobione, i wielce była zdziwiono, że ani niy było zaczynte. Julka sie jednak wymowiyła tym, że tak jom tesno bez mamulki, że niy umi sie jeszcze spamiyntać. Grofka uwierziła i poszła, a Julka wcale ni miała chyńci sie tego chytać. Wyglondała bez okno i ślimtała sztyjc. Przechodziły kole zomku trzi baby, piyrszo miała platfus, drugo miała warga obwisnyto a ta trzecio miała kciuk jak pantofel. Były to trzi przońśniczki i zlitowały sie nad Julkom, że ji pomogom tyn lyn wyrobić, ale mo ich zaprosić na wesele.
Jak sie te trzi przonśniczki chyciyły roboty, to uprzyndły cołko ta komnata lnu za tydziyń. Jak to grofka ujrzała, to oczom niy wierziła, takij przyndzy jeszcze niy widziała. Zaroz tyż swojimu synkowi kozała sie do ślubu z Julkom szykować. Julka powiedziała, ze chciałaby swoji trzi kuzynki zaprosić na wesele i grofka ze synkiym sie zgodziyli na to z chyńciom. Prziszły wtedy te trzi przońśniczki i siadły ku stole młodyj pory. Jak młody pon ujrzoł u tyj piyrszyj ta platfusiato szłapa, pyto jom, czamu to mo tako noga. My som tyż taki przońśniczki, jak młodo pani, nasza kuzynka i tyż taki piykne my kiejsik były. Ta noga platfusiato to mom od deptanio kołowrotka – pedziała ta piyrszo, drugo zaś pedziała, że od śliniynio przyndzy takij obwisłyj wargi dostała, a trzecio pedziała, że od skryncanio przyndzy tak ji kciuk spapucioł. Synek sie wylynkoł i zaroz wytrzas ze zomku cołki tyn werkcojg do przyndzynio lnu, bo niy chcioł sie doczekać chwile, kiedy Julka tako szpetno sie z tyj roboty zrobi.
Zaś Julka stała sie wielkom paniom i nic niy musiała robić, yno przed zdrzadłym siedziała i strojiła sie.
Toż pamiyntejcie mamulki, kere mocie takie lyniwe cery. Jak chcecie sie je pozbyć z chałupy, głoście naokoło, że wszystko w doma robiom i odegnać ich od roboty niy idzie.
Komentarze