Majluft

Teraz już mało kto pamiynto te czasy, jak dzielili ślonsko ze żymłom przed pochodym piyrszomajowym, tela że niy pili w tyn dziyń piwa, yno lemuniada abo zelter. Dzisioj co jedyn to mo lepszy gril w zegrodzie i jak już przidzie sobota, to wszyńdzi rozchodzi sie woń pieczonego wusztu. Yno jak jest jaki mecz w telewizorze, to same baby siedzom przi grilach, a jak zaś leci jaki serial, to rej przi grilowaniu chopy wiedom.
Najgorzij, że nikerzi grilujom tak głośno, że wszyjscy naokoło słyszom „ślonski” szlagery na nimiecko nuta z kolumnow postawionych w oknie. Przeca trza ta kultura „ślonsko” kultywować, pra?
No ja! Co sie porobiyło, to sie porobiyło, trza iść naprzod z modom. Nasze starziki tam niy grilowali i niy byli prziwionzani do telewizorow, yno tak na rychtyk korzystali z majluftu, ale wtedy to inaczyj wyglondało. Ludzie chodzili na szpacyry miyndzy łonkami, do lasa posłuchać śpiywu ptokow, a na wieczor koncertu żab przi stawach. Lepij sie to słuchało niż te dzisiejsze larmo z tymi „haimatmelodiami”.
Trza jeszcze wspomnieć o tym, że z takich szpacyrow szło jeszcze prziniyść du dom świyże kwiotki łonkowe do wazonika abo tyż młodego szczawiu na dobro zupa. Starka to nawet młode pokrziwy zbiyrała i robiyła śnich coś co przipominało szpinat na gynsto z warzonym na twardo jajkiym. Pamiyntom, jak godała, że w maju to idzie trowy nazbiyrać młodyj i zrobić z tego dobrego szałotu. O zbiyraniu kwiotkow z podbiołu i mlyczow to już niy wspominom, ale pamiyntom, jaki dobry miod umiała z tego starka zrobić, kery sie potym przidoł na jesiyń, jak kogo kaszel chyciył. Gynsipympki tyż smakowały tak prosto urwane z łonki, ale najlepij poukłodane na krajiczku chleba poszmarowanego świyżym, wsiowym masłym i posypane posiekanym na drobno sznitlochym. Toż pamiyntejcie, że w maju sie idzie łacno kustować, yno trza iść na szpacyr na łonka abo do lasa, daleko od telewizora, tam, kaj koncertujom jeszcze żaby i niy droźni nosa woń ze somsiadowego grila. Jydzcie gyńsipympki i posiekane pokrziwy, bo takich witamin w aptyce niy dostaniecie.