Autobus był fol i wszystki te boczne szuflodki były zacisnyte naszymi torbiskami, że borok szofer już ni mioł kaj uciść sześć blachow kołocza, kery tyż Familijo obsztelowała. Jakoś wszystko wlazło i mogli my sztartnyć. Po drodze stanyli my we Wadowicach, ale dopiyro przi tym nowym kościele, bo w samym cyntrum niy było mowy o zaparkowaniu, a kożdy z nos yno chcioł sie kawy napić i skosztować te słynne wadowickie „krymowki papiyski”. Niy powiym, dobre były, no i tyn nowy kościoł tyż my se dokładnie połoglondali i obcykali ze wszystkich stron fotoaparatami.
W Zakopanym wylondowali my kole piontej po połedniu. Autokar nos podwioz pod piykno chałupa o nazwie „Pensjonat pod Giewontem”, kery należy do miyszkańca Skrzyszowa, a kery jest tak zamiłowany w naszyj „Czelodce”, że co roku nom sponsoruje pobyt w Zakopanym.
Luft tam jest zdrowy, wonioncy jedlinom, jodło smakowite, toż tako uciecha yno humoru dodowała kożdymu. W piyrszy wieczor po wieczerzy rej wiodli laureaci konkursow „Po naszymu, czyli po ślonsku”. Godce, śpiywaniu i rostomajntym popisom niy było końca. Przygrywoł nom tyż do tańca som Jorguś Moskała, kerego Familijo obsztelowała.
Rano jedni pojechali do zakopiańskigo aquaparku, zaś drudzy, do kerych jo należoł, poszli pozwiydzać stary kościołek drewniany i cmyntorz, kaj leżom sławne Poloki, potym Gubałowka i Krupowki. Było fajnie jak sto diosi, ale szłapy trocha bolały.
Drugi wieczor artystyczny zorganizowała nom Familijo, ale to jaki! Jo niy wiym, skond im sie te wszystki pomysły bierom. Tym razym Ula, kero tyn zespoł prowadzi już kupa lot, zapowiedziała, że przijechoł zespoł cygański. No i rychtyk na sala wjechoł z muzykom i śpiywym cołki tabor cygański, tela że konie były na dwóch nogach, a łopraty te cygański formony mieli ze szlajfow. Tak piyknie byli poprzeblykani członkowie Familije, że prawdziwe Cygany by sie ich niy powstydziyli. Nawet zaczli szwandrać po cygańsku przi scynce wykupu panny młodyj – bo taki prziszykowali pokaz. A jak potym ta młodo pani wykrod Cygon, to takigo larma narobili, choby prawdziwe Cygony. Brzuchy sie trzynsły wszystkim ze śmiychu, a jo mioł nawet sposobność zatańcować z młodom Cygonkom, boch do szczewiczka grosik wciepoł. Bawili my sie do drugij w nocy, a jak wyglondali te ślonski Cygony, trocha przibliży wom ta załonczono fotka.
Komentarze