Jak sie przekludziyli do nowego pomiyszkanio, to dobrze, jak kogoś przibydzie, tak dycko w doma u Pytlikow godali, to tyż postarali sie młodzi i niycały rok tymu urodziył sie im synek. Dali mu Adamek i Zofijka musiała iść na macierzyński. Jednak dzisioj to tam młodzi za długo niy korzystajom z tego, bo bojom sie, że mogom robota pozbyć. To tyż Zofijka poszła już po poł roku do roboty, a ku Adasiowi musieli wziońć opiekunka. Niyroz sie i żol zrobi, jak to dobrze mo jeji starszo siostra, bo z mamom miyszko. Niy trza sie o nic starać, bo starka Maryjka jest cołki czas na pozdoryńdziu i dwoje wnukow już wypiastowała. No ja, ni może teraz chalatać, jak se wybrała chopa warszawioka, ale jest zabiyżny i ni ma czego żałować. Pytliczka tyż mu jest rada, a jak już przijadom na byzuch, to jest w siodmym niebie, jak jom tyn ziyńć po rynkach całuje, czego nigdy niy zrobiył starszy ziyńć, kery jest tutejszy. Alojzowi sie tyż taki cmukanie po rynkach niy podobo, ale już przibadoł i tyż mo rod warszawioka, kery mu dycko fajnyj gorzołeczki prziwiezie, taki przichlybny to gorol.
Dwa tydnie tymu przijechali warszawioki do Pytlikow z takom brynzom, że oba muszom jechać na jakiś kurs do Hiszpanie, bo firma ich tam posyło, a na dokłodka ta jejich opiekunka zachorowała. Wol niy wol, jak tu dziołsze niy pomoc. Toż obydwoch starzikow wziyni do auta i pojechali do Warszawy swojigo wnuka Adaśka pielyngnować. Adasiek jest zdrowy i mocny. Poradzi już som kole mebli chodzić, abo jak sie go trzimie za rynce, bo tak to jeszcze bajuko, przeca mo dopiyro dziesiyńć miesiyncy.
Sztyry dni byli młodzi w tyj Hiszpanii, ale co tam Alojz z Maryjkom wystoli, trocha mi Alojz pogodoł. Najgorzij, jak trza było co zagrzoć na tym nowomodnym piecu elektrycznym. Wszystko yno palcami dotykać, a piszczy, blinko i człowiek niy wiy, jak to posztelować. Telewizora wcale niy oglondali, bo jak go Zofijka przed wyjazdym załonczyła, to sie niyskorzij som wyłonczył i już go niy poradziyli puścić. Najgorzij padoł mi Alojz, jak Maryjka upiykła karczek na obiod i pedziała: weź se stary i pojydz, bo jo ida Adasia uspać do izby. Pytlik zaszoł ku piecu, naladowoł se zimiokow, konsek tego upieczonego karczku i poloł se to zołzom, kero w kastroliku se pomału pyrszczyła. Siod ku stole i jy, ale coś mu ta zołza niy podłaziyła, bo jakoś słodko była. Dopiyro dostoł za swoji, jak Maryj prziszła z izby i pyto się, kaj jest ta odżywka dlo Adasia, kero tu w kastroliku sie grzoła?
Komentarze