Już keryś tam rok porzond zaproszajom mie do jury Regionalnego Konkursu Wiedzy o Ziemi Śląskiej „Moja Ty Ziemio Rodzinna”, kery dycko mo swój finał w Szkole Podstawowyj nr 18 w Boguszowicach. W tym roku było to 28 maja. Rod tam jada, bo zawsze jest sposobność pogodać z ludziami, kerym naszo godka i kultura ślonsko jest blisko sercu. Raduje sie tyż człowiek, jak widzi te dzieci, kere z wielkim przejynciym do tego konkursu podchodzom, żeby nojlepij wypaść.
Co roku tyż Pani Kazimiera Drewniok staro im sie tak te zadania konkursowe opracować, żeby wiedza o naszym regionie poszyrzyć. Trza tu pedzieć, że ni ma leko wszystki te zadania zrobić tak, żeby dostać nojlepszo ocyna. Kożdy szkolorz – a było ich bez sztyrdziyści, tych najlepszych, powybiyranych z rybnickich szkoł – dostoł do rynki siedym pospinanych kartek wielkości A4, a kożdo kartka to malonek – dzieło sztuki idzie pedzieć – na kerym widać ciekawo budowla z regionu, ludzi i zwierzynta. Miyndzy obrozkami pytania napisane i miejsce, kaj dzieci mogły napisać odpowiydź. Na piyrszyj kartce trza było rozpoznać godło Śląska, tj. żołtego orła na modrym tle, i trocha to smutne, że niy wszystkie dzieci to wiedziały. Na tyj samyj stronie było tyż wolne miejsce, kaj trza było namalować herb z miejscowości, kaj dziecko miyszko, i trza było dodatkowo tyn herb opisać. Drugo kartka tyż niyjednymu namiyszała, bo były tam rostomajnte obrozki: radiostacja w Gliwicach, kero yno pora dzieci rozpoznało; zomek w Rudach – już trocha wiyncyj znany i kościołki drzewiane. Zaś na trzecij i czwortyj kartce były namalowane zwierzynta i pytania, kere z nich idzie spotkać w naszym regionie i kere som pod ochronom. Tyż trocha mie zdziwiło, że żuber i pytanie, z jakim miastym na Ślonsku sie tyn zwiyrz kojarzi, tela trudu zado. Rozśmiyszyły mie odpowiedzi dzieci na pytania, kaj trza było na ślonski przetłumaczyć słowo jajecznica. Dwoje dzieci yno napisało smażonka, zaś wiynkszość nic niy napisała abo nazwali to jajcowom, jajcownicom, a jedno napisało pieczonka jajeczno. Szykownie pra? No ja, ni ma sie co dziwić, teraz chyba mało sie robi smażonki, bo godajom, że to cholesterol.
Na szostyj kartce Pani Kazia namalowała cołko rodzina z trojgiym dziecek w strojach ślonskich i trza było napisać jak nojwiyncyj nazw tych wszystkich oblyczek i dodatkow. I tukej mie zaskoczyło, że dziecka znały bardzo dobrze te nazwy. Jedno wymiyniło nawet 35 nazw. Zaś na ostatnij stronie były rostoliczne beboki i straszki ślonskie, trza było je tyż poznać i nazwać. Juzaś żech sie zestaroł, bo mocka dziecek napisało, że taki chopek w czerwonyj mycce, we wodzie nazywo sie wodnik.
Fajnie było w tyj szkole jak diosi, humory nom wszystkim dopisywały, ale nojbardzij uradowano wyglondała ta paniczka, kero tela trudu se zadała z tym malowaniym, widać to chyba na dołonczonyj fotce.
Komentarze