– Niydowno, prawisz! A jo jak wejrza na tyn wielgi sklep i tyn parking, to mi sie zaroz przipominajom wykopki. Przeca tu były pola z majontku Józefowiec. Zaroz w tych powojynnych latach z bratym i ze starkom my tu lotali, tak jak dużo inkszych ludzi z Rybnika i Wielopola, zbiyrać zimioki, kere zostały ziymiom przisute bez te piyrsze maszyny do kopanio zimiokow. Kukurzica tyż my na tych polach zbiyrali po tych majontkowych żniwach. I to mi sie zdo, że tak niydowno było, ale tyn czas gibko ucieko…
– Ja prowda godosz Hajnelku, moja ciotka nigdy zimiokow niy kupowała na zima, bo dycko lotała z kajsterkom po tych zakładzkich polach i pełno grodza naforanciła.
Ale to sie już niy wroci, a my już som przi kasie do basynu.
Patrz, wiela bilet kosztuje, chneda piyńć złotkow dlo nas pynzjonistow.
– Widzisz, czego my sie doczekali: żeby rzić zatoplać w tym nowomodnym basynie, muszymy sie bez dwa dni piwa odmowić. Piyrwyj za darmo my sie okompali i poleżeć szło na czystym piochu, a szatnie my mieli za krzoczkami wiyrzbowymi przi drugim stawie.
– No a pamiyntosz, jak my już do technikum łaziyli i gnali nas do roboty przi kompielisku? Cołki tyn wał, kaj z wielopolskij tamy woda pusciyli na Ruda, my usypali. Przeważnie to rybnicki szkolorze musieli robić i dycko nom godali, że sie mogymy potym za darmo chodzić kompać na kompielisko. Jak se to wspomna, to mie zaroz pod łopatkom rzgo, bo tako ciynżko robota dzieckami załatwiali, a teraz jeszcze nom tela płacić kożom i to z ulgom. Niy wiym, czy tam wleza, jak słysza jeszcze te larmo.
– Wysz co! Jo tyż tak rozważuja, po co tam rychtyk bydymy leźli? Dyć z tyj zjyżdżalni już możno niy zjadymy. Godała mi wnuczka, że oto jakoś starszo wyrychlato paniczka chciała sie poasić, że jeszcze tako wezgierno i potym jak sjechała, to na koncu tyj ruły musioł jom ratownik pamiyntać.
– Toż co? Niy idymy do tego ula i szlus. Weznymy se po jednym piwku za to i pójdymy nad rzyka Ruda ku sztyrem klapom, tam, kaj my dycko ynty robiyli i okoniki chytali na lyskowe wyndki i hoczyki ze zicherki.
Nogi se potoplomy we wodzie za darmo i tak choby my sie okompali, a żodyn nom niy bydzie larmowoł. Do wieczora daleko.
– Mosz recht! Idymy nojprzod po piwo do tego sklepu, kaj my na wykopki chodziyli.
Cdn.
Komentarze