Larmo

– Obejrzij se, a jo myśloł, że łon taki był, yno tyn bonker taki wysoki wystawiyli. Musza zaroz obejrzeć ta fotka, co mi synek w maju zrobiył. Ale godej mi zaroz, co dzisioj robiymy, kiej żeś do mie prziszoł.
– Prziszoł żech, bo niy poradza w doma wytrzimać.
– Coż tak? Czyś sie ze starom powadziył?
– Niy, ale od samego rana somsiod trowa kosi w zegrodzie. Kupiył se jakoś nowo maszyna, kero takom nylonowom żyłkom kosi, ale larmuje jak diosi. Jo tam jest już przigłuchawy, ale taki wycie to by umrzika ruszyło. Tak se myśla, kaj som te czasy, jak sie kosami wszystko kosiło. Cicho było, yno było słychać lecy, kiedy szkyrtanie osełki po kosie. Czasym tyż klepanie kosy na babce, ale to było choby muzyka.
– Ja Hajnel! To sie już niy wroci! Przeca jak my byli młodzi, to wszyjscy kosami abo siyrpami trowa w zegrodkach kosili. Kożdy mioł przi chałupie kroliczok abo jako koziczka chowoł i nic sie niy marnowało. Trowa sie sfutrowało, a reszta sie suszyło dlo krolikow na zima. Woniało wszyndy sianym, a teraz wonio spalinami z kosiarki. Czasym to jeszcze polom na zegrodach te siano, że okna niy otworzisz, bo kurzu wszyńdzi pełno. Dobrze, że to niy kosi sie dziynnie i jakoś tam idzie wytrzimać te larmo. Pońdziesz z chałupy, jak cie to szteruje i zbyte. Gorzij jak mosz somsiada, co mo jako werksztela i kożdy dziyń ci larmuje. Francik, tyn, co miyszko w Niedobczycach, godoł, że kole niego stolorz wystawiył chałupa i teraz cołki dziyń mo larmo. Jak niy krajzyjga, to jakoś heblarka butluje na cołki karpyntel, a ciebie tu kosiarka mierzi.
– No ja, to mosz recht, człowieka starego to wszystko mierzi, ale czamu taki pieroństwo sprzedujom? Tyn somsiod se musi taki słuchawki przi tym koszyniu zakłodać. Przeca to musi mieć jako norma butlowanio. Jo tyż mom kosiarka i tak cicho chodzi, że jak roz sztrom wyłonczyli, to jo durch jom cis i nerwowoł żech się, czamu zaś trowy niy kosi, jak noż dopiyro co nabruszony.
– Teraz to mie Hajnel chyba zaś chcesz za balek wciś, jo ci już nic niy wierza. Sztrom wyłonczyli i tyś po proznu z kosiarkom lotoł po zegrodzie? Ty byś mog rychtyk bojki pisać bajtlom. Dobrze, że cie znom od dziecka, bo jeszcze bych mog uwierzić.
– No dyć trocha błoznow to tam żodnymu jeszcze niy zaszkodziło, ale z tym larmym to ci godom prowda. Toż zrob teraz Stanik dobrego kafyju, bo żech przinios konsek kołocza z apfelmusym. A widza, że u ciebie tyż tela augustek na placu leży, sromotnie tego latoś, a zdało się, że płonki niy obrodzom.