– Halo Stanik! Dzwonia do cia, bo synek jedzie do Rud po łobiedzie. Oblykej sie drabko, wezna swoji wyndki i pojadymy śnim na Pniowiec do Chwalyncic, jak pojedzie nazod na wieczor, to juzaś po nos nadjedzie.
– Piyknie Hajnelku, bo taki hyc dzisioj, co ni możno. Przi wodzie zawsze jest chłodnij. Naszykuja se yno jako sznita, bo łobiadu niy byda jod. Staro warzi niyskoro, bo tak ciepło, to sie o jodle niy wspomni. Byda czekoł na cia przed chałupom.
Tak zaś dwaj kamracio dostali sie na Pniowiec bez żodnyj komedyje. Hajnel wzion swoje kije, biksa z glizdami, madami i świyżom kluskom z wanilijom. Stanik zaś swoja kajsterka z jodłym i dwoma biksami żywieckigo. Znojdli se fajne miejsce w ciyniu, blisko wody, toż siedli se na dece. Hajnel rozłożył swoji klamory, a Stanik mu kibicowoł i przigadowoł, jak to dycko mo w modzie.
– Powiydz mi Hajnel, jak sie chyto ryby na zygarek? Bo mój znajomy godo, że ich tak chyto i nigdy o brusku du dom niy przidzie z wyndkowanio. Umisz tyż tak chytać?
– Ty mi tukej do paji niy dmuchej! Taki wice o wyndkorzach to som stare jak „Hoim gruba”, ale tego niy znom, powiydz, jak to sie chyto?
– Wrazisz rynka ze zygarkiym pod woda i jak kaper przidzie obejrzeć wiela godzin, to wtedy gwizdniesz młotkiym w łeb i jest twój.
– Patrz! Fajny wic, ale powiydz mi teraz ty mondralo, na co wyndkorze bierom na ryby korbflasza octu?
– Niy wiym!
– A widzisz, tyż żeś ni ma taki mondry, ale ci powiym. Jak chycom takigo ciućmoka jak ty, to go gibko marynujom.
– My se tu drzistomy gupoty, a ty Hajnel niy widzisz, że szponta ni ma. Wziyno ci coś, zacinej chopie!
– Jeronie! Rychtyk i zaś mi chyba glizda zeżarły? Ale coś tam idzie, chyba jakiś okonik mały, bo widza coś różowego.
– Dyć to mosz jakiś gybis na hoku, musioł żeś za fest zaciońć i wyrwoł żeś zymbiska jakiś piranii, bo sam tyż som taki zorty.
– Niy błoznuj Stanik, bo to rychtyk jest czyjś wiyrchni gybis i to widać dość nowy, bo ni ma tak zgryziony jak twój, przipasuj, możno ci bydzie pasowoł.
– Możno żeś go utopkowi wytargoł? Abo pryndzyj topielcowi?
– Jo myśla, że to keryś straciył przi kompaniu. Mie sie tyż taki coś przitrefiyło nad morzym, ale na szczyńści na płytkij wodzie i gibko żech go znojd. Teraz tyn borok, co go straciył, bydzie papinki jodoł, zanim mu zymbocz nowy zrobi. Chyba że to poczyto i zgłosi sie do utopka z Chwalyncic.
Historia z gybisym jest prawdziwo, znojd go Pan Eugyniusz Pęczek z Rybnika w stawie Pniowiec. Informacjo pod tel. 032 421 02 73.
Komentarze