Jak żech chodziył do szostej klasy, poszli my roz w taki piykny dziyń wrześniowy z całom klasom do lasa. Mieli my ostatnio lekcja przirody i nasza Pani powiedziała, że wycieczka bydzie naszom lekcjom i to, co ciekawego uwidzymy w lesie, trzeba bydzie dokładnie opisać, a kto chce, może tyż namalować. Może to być jakoś roślina abo tyż zwierzontko i to bydzie na ocyna. W lesie było tak piyknie i tela rostolicznych roślin naokoło, że ciynżko było wybrać, co by opisać. Na młodych bukach i dymbczokach czerwiyniły sie liście, zaś nikere krzoki miały złote i żołte listki. Na jarzombinach wisiały kisty pomarańczowych kulek, a kole nich zaś na czerymchach blyszczały w słońcu czorne kulki. Trocha dalij na kraju młodego laska sosnowego rosło pełno brusin i dziołchy gibko dały sie do zbiyranio. Nikere urywały cołki gałonzki z brusinami, ku tymu dokłodały pora kolorowych liści i cićki ze sitow, takie bukety robiły, żeby to potym w doma namalować i opisać. Stanik lotoł za strokatom żabom, a Boleś ze Zigusiym zbiyrali dymbionki. Rufin znojd kolorowe piorko od sojki i rozglondoł sie po stromach, czy aby kaj niy siedzi. Kożdy se tam coś obroł do opisanio i jo tyż szukoł czegoś ciekawego. Chcioł żech znojść jaki piykny kwiotek, ale nic znojść niy szło, wszystkie kwiotki leśne sie kajś pochowały. Naroz widza na takij przecince cołki szlak lilowego wrzosu, aż mi dech chyciło, co tak piyknie to wyglondało. Szoł żech gibko w ta strona przez krzoki, a po drodze wszyski pajonczyny babskigo lata chytały sie na mie. Urwoł żech cały buket tego wrzosu, a za mnom szła Krysia, toż żech i padoł, że zasusza tako jedna gałonzka i przikleja w zeszycie do przirody zamiast malonka. Za chwila cołko klasa była przi nas i kożdy targoł tyn wrzos, żeby mamie du dom prziniyść do wazonika. Nikerzi ściongali yno same kwiyci z tych gałonzek i do kapsow bikowali, bo z wrzosu jest bardzo dobry tyj, godali tyż jedni „erika tyj”. Fajnie i wesoło było na tyj leśnyj lekcji przirody, kożdy mioł już coś nazbiyrane do opisanio. Halina i Usia to miały cołki naroncze gałyńzi z jarzombiny, bo bydom z tych kulek kety robić.
Za trzi dni mieli my juzaś prziroda i pani powiedziała:
– No ciekawa jestem, jaki efekt przyniosła nam ta leśna lekcja. Otwórzcie wasze zeszyty i pochwalcie się.
Przeszło połowa dzieci miało w zeszytach zasuszono gałonzka wrzosu i opis, że z tego sie robi „erika tyj”…
Niy wiym, czamu sie tak stało, ale jo yno Krysi przezdradziył, że zamiast malonka zasusza gałonzka wrzosowo.
Komentarze