Stanikowi jeszcze śmiyszek lotoł pod nosym, jak se wspomnioł na ta hajnelowo „wkładka” we wczorajszym żurku, ale żeby sie Hajnel niy kapnył, gibko odegnoł te wspomniyni i pyto sie swojij Rołzy:
– Wziynaś mi te badki, kere żech narychtowoł?
– No przeca! Wziynach twoji badki i mój badykostium, ale niy wiym, czy do niego wleza, bo downoch ni miała go łobleczony. A ty Frida mosz badykostium?
– Wziynach do przigody, ale czy sie opowoża go oblyc, tego niy wiym, obejrzymy, jak tam bydzie.
Autobus stanył na parkplacu w Słowacji i nasi pynzjoniści ujrzeli piykny i nowoczesny obiekt. Na parkingu stoło już pora autobusow z polskom rejestracjom, a w pojstrzodku pod kasom kolejka jak diobli i wszyjscy po polsku godajom. W reklamowkach majom rynczniki, badki, jakiś flaszki z napojami i zawijonki z jodłym, czymu fest sie dziwiyli Hajnel ze Stanikiym. Rołza z Fridom niy chciały tam ani lyść, jak sie dowiedziały, że trza bez 50 zł dać za bilet, jednak dały sie nakusić swojim chopom i w końcu stanyli do raje pod kasom. Nawet polskimi piniondzami mogli zapłacić. Zamiast biletow dostali jakiś ślepe zygarki na rynka, kere przi wlazowaniu trza było przistawić do takigo czytnika.
– Co to za technika sam majom – padoł Stanik, odbiył tyn swój zygarek i zapion se go na rynka tak jak to wszyjscy robiyli. Hajnel tymczasym poszoł sie wypiskać, bo już wytrzimać niy poradziył. Jak wyloz z ustympu, to już swojich ludzi niy widzioł. Frida tyż na niego niy czekała, toż wloz, ale zygarek wraziył do kapsy. Zaszoł do szatnie i widzi ludzi poseblykanych przi otwartych szranczkach stojom, to tyż próbuje otworzić jedyn, potym drugi i trzeci, ale żodyn sie niy otwiyro. Dopiyro mu jakiś młodziok padoł, że tam jest taki czytnik, na kerym z jego zygarka sie nomer pokoże, kery szranczek jest jego. Co z tego, jak ni mo swojich badkow, a Fridy z reklamowkom ni ma. Toż wloz na te basyny, kaj żodyn łobleczony niy łaziył. Poczuł sie gupie, jak wszyjscy sie dziwajom na niego. Na szczyńści ujrzała go Frida, kero już z Rołzom i inkszymi babami z ich wycieczki moczom sie w jakimś keslu z ciepłom wodom.
Nojprzod go objechała, kaj sie to słańdo, a potym poszła śnim ku tym szranczkom. Wszystko by sie fajnie skończyło, ale okozało sie, że baba mu zapakowała w doma jego dynamohouzy, kere siongały mu do kolan.
Niyszczyńśliwy Hajnel jak wloz do tego kesla z ciepłom wodom, to od gańby przesiedzioł w nim 3 godziny i potym niy poradziył do autobusa dońść. A co Frida za to wystoła, tego sie już niy dowiymy.
Komentarze