Mioł tyn młynosz cera na wydaniu i mocka karlusow z pobliskich wsi uwijało sie kole jego piyknyj Halinki. Kto by sie niy chcioł ożynić u tak bogatego siedloka i na dokłodka tako szwarno i robotno dziołcha za swoja baba pojońć?
Halinka jednak była wymyślato i przebiyrała w tych synkach choby koza w gniyłkach. Spodobała sie tyż utopkowi, kery łońskigo roku przikludziył sie na młynarzowe stawy z rzyki Rudy, bo był to taki suchy rok, że w Rudzie wszystki ryby i raki sie potraciyły. Tu na Młynach w stawach było wody aż za moc i rybow niy brakowało.
Szpetny był tyn utopek jak diobli, ale jak to utopki poradzom, tak tyż umioł sie i tyn przemiynić w gryfnego i wyzgiernego karlusa, a potym przigodoł dziołsze spotkanyj niby cufalym na grobli miyndzy stawami. Halince sie fest spodoboł utopek, to tyż potym przichodziył po kryjomu do nij wieczorami na zolyty. Halinka spała na gorze w małyj izdebce i tam dycko loz ku nij po drabinach, na kerych rosły winogrona. Figlowali tam niyroz, ale yno do połnocy, bo przed połnocom karlus drabko sie traciył. Za jakiś czas prziszoł utopek do łojcow z dobrom gorzołeczkom prosić ich, czy może ku Halince chodzić na zolyty, na co sie łoni zgodziyli, bo widać było, że karlus postawny i rynce mo wyrobione. To tyż potym młodzi chodziyli na muzyki we wsi, ale tyż yno do połnocy, bo prawiył, że mu tatulek przikozoł przed połnocom być w łożku. Prowda jednak była tako, że o połnocy kożdy utopek zamiynio sie w siebie i tego sie boł, żeby Halinka niy uwidziała go z takom szkaradnom gymbom i końskim kopytym na prawyj nodze. Dziołcha jednak miarkowała, że to może być utopek, ale niy boczkowała mu za wiela, bo sie ji te nocne figlowanie zapodobało.
Podpadło to tyż tatulkowi od Halinki, że synek dycko przed połnocom po cichutku ze schodow zlazuje, żeby nikogo niy obudzić, ale łoni tak dycko wachowali i nadsłuchowali, to tyż wszystko wiedzieli. Jedyn roz mamulka przestawiyła zygor w izbie o godzina do zadku z ciekawości, co tyż z tego bydzie. No i było, karlus przepasowoł połnocka i zamiyniył sie w utopka. Halinka jak go ujrzała, narobiyła larma i postawiyła cołko chałupa na nogi. Młynorz wyparził do siyni z orczykiym i tak utopka sproł, że borok potym po sztyrech ku stawie mazoł. Schody na gora musieli jednak nowe zrobić, bo utopek ich całe tym swojim kopytym zdrachoł. Potym zaś z pomsty przerwoł groble ze stawow i zaloł im cołki młyn i chałupa. A było to przed samymi jesiynnymi odłowami kaprow. Wszystkie ryby poszły za wodom, a we Wielopolu ludzie nie musieli kaprow na świynta kupować, bo chytali je na łonkach i trzimali we waniynkach aże do Wilije.
Komentarze