– Witej Hajnel! Niy spodziywoł żeś sie, że dzisioj do ciebie przida, pra?
– Tak po prowdzie niy, bo żeś ostatnio nic niy wspominoł, a jo chcioł już do ciebie dzwonić. Cni sie jakoś, a ta pogoda tako niy bardzo, roz śniyg, roz ciapryka i niy chce sie z chałupy ruszać. Zaś nas ta zima latoś zaskoczyła, tela śniega w te Świynto Niypodległości spadło, ale za to dziecka miały uciechy. Przi naszyj drodze w co drugij zegrodzie abo na placu bałwany sie pokozały.
– Ani mi niy godej, bo jo niy zdonżył płonek poobrywać ze stromow, a tak latoś obrodziyły, co ni możno.
– Dyć jo tyż yno z tych niskich stromikow poobrywoł, a reszta została i śniyg ich zasuł, chyba już bydom zmarznyte.
– Do mie mioł przijść ze synkiym tyn Kazik, co kole mie buduje, poobiyrać ta reszta jabek, bo jo i tak ni ma żech w sztandzie to zrobić. Tak przichodziył, że teraz już niy musi, bo som obmarznyte i ptoki bydom miały co maszkecić. Fajnie, ale ty niy wiysz Hajnelku, po co jo do cia prziszoł. Mom fajno nowina do ciebie.
– Toż pyndaluj, bo umiyrom z ciekawości.
– Tyn twój pultok sie znojd!
– Ale! Kaj sie znojd? Downo go tyn szofer zjod i na pewno se pochwalowali, bo był wypasiony jak trza.
– Znojd sie w Boguszowicach i wszystko wskazuje na to, że to tyn twoj pultok. Przedstow sie, że moja Rołza była u szwoczki na Nowinach i od nij cera chodzi do ekonomika z jednym synkiym z Boguszowic. Chwolił sie synek w klasie, że bydom mieli na Godni Świynta hyndyka, kery im z nieba spod, bo tak padoł jego tata, jak pultoka du dom przismyczył. Przijechoł na baza i dźwignył kiper na myjce, a tu ryp, coś spadło ze zadku. Okozało sie, że to wielki pultok bez łepy i na dokłodka jeszcze ciepły. Inksze szofery sie śmioli, że to chyba Świyntymu Mikołajowi wypod z miecha, bo już w niebie szykuje geszynki.
– Wiedzioł tyn Mikołoj, kaj to mo spadnyć, bo bydziecie mieć fajne świynta, yno go w doma osnorzić i do zamrażarki wstyrczyć. Ta twoja piontka łeboni bydzie miała co ogryzać – padoł mu inkszy szofer.
Rołza, jak to usłyszała, pedziała, że wiy, komu tyn pultok spod na te auto przi zbijaniu i bez to żech prziszoł sie spytać, czy po niego zajedziesz do tych Boguszowic, adres już momy, bo cera od szwoczki tymu synkowi to pedziała, a pultok jest cały zamrożony.
– Ha! Ha! Ha! – roześmioł sie Hajnel, a jego Frida zaroz pedziała:
– Staniczku, poślij Rołza do tyj szwoczki, żeby dała skozać tym ludziom, że mogom se spokojnie świynta zrobić z tego pultoka, bo my tyj gowiedzi momy dużo, a jak majom tela dziecek, to na pewno im na wszystko niy styko. A niych jeszcze powiy, że tyn Świynty Mikołoj im życzy smacznego i mo na miano Hajnel.
Komentarze