Maryjka już była tako śpionco, że pedziała:
Starko! Jo sie legna na leżance i byda czekała, aż wy przidziecie z kościoła. To pódymy potym do chlywa z mojim Bercikiym; pogodomy se z Maksym i Krasulom. Na pewno moj misiek bydzie tyż śnimi godoł.
Bydzie, bydzie Maryjko! Łobejrzisz, na pewno bydzie godoł.
Za chwileczka Maryjka spała ze swojim Bercikiym na leżance. Starka przikryła jom plyjtym i po cichu wylazła z izby.
Jak prziśli z Pastyrki, to Maryjka już spała na dobre i cołki czas przitulała do sia swojigo nowego przociela zielonego, pluszowego miśka.
Mamulka jom wziyna do kupy śnim i zaniosła ich do maryjczynego łożeczka. W nocy Maryjka cołki czas sie ruszała i coś tam pod nosym mruczała, tak ani by z kimś se pogadowała. Mamulka pomacała ji czoło, czy aby goronczki ni mo, ale niy była goronco i to jom uspokojiło.
Rano wszyjscy jeszcze śpiom, a Maryjka oczy otwarła i pogaduje se ze swojim berkiym:
No widzisz malutki! Jak ty umisz piyknie godać, ani żeś niy chcioł wylyść z chlywa. Tak żeś sie pogadowoł z Maksym i Krasulom. Kot Piguła tyż chcioł z tobom godać, yno starka mu kozała iść myszy chytać. Szkoda, że Makuś od somsiadow niy prziszoł ku nom, jak my go wołali. Yno pedzioł, że musi na miesionczek szczekać, bo zamiast świycić, to sie za chmury krył.
Starko! Stareczko!
Co moja rybko? Czamu jeszcze niy śpisz?
Bo żeście mie samyj w chlywie łostawiyli i jo niy wiedziała, o co sie mom pytać Makslika.
Starka sie kapła, że na pewno i sie to śniyło, bo przeca nikaj w nocy niy byli. Ale żeby Maryjce tego niy popsuć, to pedziała: – Bo mie sie już spać zachciało, a ty ciyngiym yno z tym Bercikiym godałaś i godałaś!
Starko! Ale Agata mi i tak niy uwierzy, bo Bercik pedzioł, że bydzie sy mnom godoł yno wtedy, jak żodnego przi nas niy bydzie. Bo łon chce yno sy mnom godać i ze wszystkimi zwierzontkami. We Wilijo yno bydzie godoł ze wszystkimi.
Starka i yno przichwoliła i ośmioła sie sama do sia, że Maryjka mo tako wybujało wyobraźnia. Tako niby mało dziołcha i tak poradzi czarować. Chneda by sama w to starka uwierzyła, że doprowdy była śniom w nocy w chlywie. No to teraz se z tym Miśkiym bydziesz ale pogadować, pra?
Toć stareczko! Łon mi pedzioł, że mie nauczy ze wszystkimi zwierzontkami godać. Z kotym Pigułom, z Makusiym od tego Bercika zza płota i z kroliczkami nawet!
No to ci teraz rady niy bydzie Maryjko! Tela jest rostolicznych zwierzontek, a ty ich bydziesz wszystkie rozumieć.
Widzisz, a Agata niy wierziła, że moj Bercik bydzie umioł godać.
Komentarze