- Dzisioj, jak żech ci Kazik łobiecoł, połosprowiom trocha o „Królu Zdrowia”, kerego starzi rybniczanie napewno se przipominajom.Miyszkoł na „Meksiko” i dycko na torgu stoł z rostomajntymi medykamyntami, kere som robiył z rostolicznych zielin. Suszone zieliny, po kere jeździył nikedy daleko do Polski, tyż sprzedowoł.Od Staryj Polski aże do piyńćdziesiontych lot „Król Zdrowio” lyczył tymi ziołami ludzi z Rybnika i okolic. Niby nic takigo, bo wszyndzie, na cołkim świecie ludzie znali cudowno moc tych lykow z „Bożyj aptyki”. Nasz jednak zielorz był niy zwyczajny. Ludzie go dycko obtoczyli ciasno i słuchali z ciekawościom jego głośnego zachwolanio tych cudownych lykow. Nojwiyncyj dycko bajtli kole niego sie zbiyrało. Pamiyntom roz jak łebonie sie za fest na niego ciśli, to ryknył na cołki pysk: „ Cofcie sie bajtle, bo mi szałfynster wybijecie...”abo : „Teraz dzieci zatkejcie uszy, bo byda o wekslach godoł...” Mioł tych powiedzonek na zawołanie.Niy było by w tym nic śmiysznego, ale te wszystki zioła i nalywki mioł na takim sztandzie, na dwóch koziołkach, tak jak wszyscy handlyrze wtedy mieli, a łon tu o szałfynstrze fanzoli.Mioł tyż swojich starych kontmanow, kerych znoł po imiyniu i po nazwisku, już z daleka ich poznowoł i głośno witoł, np:- Dziyń dobry Pani Zofijko ! Podźcie do mie po ta maść na chinerpest, widza, że Wom pomogło, bo już tak fest niy kulwitocie, mom do Was jeszcze lepszo... – i tak zagańbiono kobiytka juzaś kupowała od niego zachwolane mazidło.Słowym, niy było choroby, na kero by „Król Zdrowio”ni mioł specyfiku. Wszystko było u niego, maść na himoridy, na spuchnyte mandle, bol zymbow i głowy, na żołondek dobre nalywki – niyroz żech kupiył – na gupota, na głuchota i charczynie w plucach, rwanie w krziży, babskie dolegliwości i rostoliczne łomanie kości. Wszystki te choroby głośno dycko wymiynioł i zachwaloł działanie tych swojich lykow i tak mu zawsze sie wszystko rymowało, że doprowdy sie piyknie to słuchało.Nojwiynkszo uciecha była, jak nazwoł jedne swoji krople „Kuramin”. Już teraz Kaziczku niy pamiyntom jak to godoł, ale trocha spróbuja ci to powiedzieć...:„ Kuramin działo na szlak, a posłuchejcie Króla Zdrowia, jak to działo zaroz powia... Jak ryma mocie, trzi krople „Kuraminu na wata docie, trocha tego powoniocie i zaroz nosym dychocie.Jedna baba mlyka ni miała, jak mie posłuchała i „Kuramin” spróbowała, za trzi dni mlyczarnia łotwiyrała.Starka, kero z łożka stanyć sama niy umiała, trzi krople „Kuraminu” skosztowała i cołko noc sama do haźla lotała.Jednego chopa zymbiska bolały, wypiył keliszek i zymby same wylatowały.Jak ze starkom zgorszynie mocie, trzi krople „Kuraminu ”do teju wlejecie, starce wypic docie, wieczny odpoczynek zerzykocie i na dycki spokoj mocie...- Tela tych wszystkich przechwolanek o tym „Kuraminie” wymyśloł, że ludzie stoli kole niego i śmioli sie do rozpuku, a łon cis kożdymu do rynki flaszeczka tych kropli, kasowoł i do kapsy ciepoł .Nima już dzisioj takich handlyrzy jak był „Król Zdrowia”, kożdy coś kupiył od niego, bo drogo to niy sprzedowoł. Pora czeskich broł za tytka suszonych zielin, mazidło, abo flaszeczka kropli. Jak widzioł kogo co go stać niy było, to za darmo doł i godoł : weźcie se, jak wom pomoże, to porzykocie za mie...Harypilowi roz doł jakiś zieliny, co by go od picio piwa odzwyczajić, ale łon zamiast tej z tego pić, to skrynty robiył i z kamratami wykurził. Jak sie go „Król Zdrowia” pytoł, czy pije te jego lyki, to tyn mu pedzioł, że takij fajnyj tabaki jak ta, downo niy kurził.
Komentarze