Od szkolnego bojiska z mojij zegrodki dzieli mie płot i trocha krzokow. Z dwa tydnie tymu, jak było trocha fajnyj pogody, zaczon żech dokłodać patyki do grochu, bo tak sie zabroł do spinanio, że brakło mu drabiny do nieba. Słysza, że na szkolnym bojisku synki grajom fuzbal, ale ta godka przi tym graniu tako kludziyli, że mi zaczły uszy wiyndnyć, co drugi słowo na „k” abo „h” i jeszcze miyndzy tym okroszone jakimsik słowkami, kerych znaczynio chyba sie niy dowiym, bo to jakoś nowomodno godka była. Chocioż tyż czasami zaklna, jak sie znerwuja – przeważnie w aucie, jak sie nikerym śpiycho i przed pyskiym mi zajeżdżo, ale te moji pieroniynie to sie tak mo do tego przeklinanio od tych bajtli, choby germuszka do tłustego gulaszu. Co to za czasy nastały, to sie w głowie niy mieści, dyć w naszych szkolnych latach my ani takich słow niy znali, a jak kery padoł „pierona”, to trza było na kartce napisać, żeby farorzowi przi spowiedzi poczytać, wiela razy sie używało brzidkich słow. Śmiyszne, pra?
Pisza niy po to, żeby kogo poniżyć, ale yno po to, żeby sie zastanowić, czymu ta nasza godka tak sie zmiyniła. I tukej trza pedzieć, że niy zależy to od tego, czy sie jest zwykłym robotnikiym po podstawowce, czy tyż sie jest wysoko wyszkolonym profesorym. Bezmała im bardzij szkolony, tym te „ciepanie miynsym” jest bogatsze.
Ja, dobrze, powiy niyjedyn, jak człowiek sie znerwuje, ciepie potym tymi przeklyństwami, bo w nerwach niy poradzi piyknych słowek dobiyrać. Nojciekawsze jest to, że godo sie wszyndzie, żeby przi dzieciach niy wadzić sie i niy używać takich wulgaryzmow, a dziecka wszystko flot chytajom i jak sie znojdom miyndzy rowniokami, to ciepiom tym miynsym niy gorzij niż starsi. A brzidkie słowa zabijajom w ludziach to co nojpiykniejsze, delikatność i cołko romantyka, keryj dzisioj młodzi niy znajom i przipisujom te uczucie yno starym, niymodnym starzikom.
Na koniec chciołbych przitoczyć jedna powiarka arabsko: „Utnij se jynzyk, zanim jynzyk utnie ci głowa…”.
Komentarze