Nasza klasa

Kożdo nowość mo dycko to do siebie, że jednym sie to zaroz spodobo, a drugim dopiyro za jakiś czas. Jak to starzi ludzie godali: musi to łozdrzeleć. Tak tyż jest z tom „Naszom klasom”, tako nowo graczka w internecie. Pamiyntom, że dycko nowo graczka nojbardzij podobała sie dzieckom i łone tyż nojgibcij sie wszystkigo nauczyły, ale tyż piyrsze sie niom znudziyły. Niy było kiejsik internetu, ale co jakiś czas wynochwiali ludzie taki graczki jak „jojo”, „klik-klak” i inksze tam „klipy” czy „pinki”.
Z tom „Naszom klasom” tyż tak możno bydzie, ale podwiel co, to bawiom sie niom i starzi, i młodzi. Trza tu pedzieć, że to coś fajnego i som żech sie w ta graczka wciongnył. Założył żech se klasa z mojigo rocznika ze szkoły podstawowyj i średnij tyż, ale okozało sie, że jo yno som do tyj klasy w podstawowce chodziył, żodyn sie do tyj mojij klasy niy chce wpisać i zowiszcza tym młodszym rocznikom, kerzi majom wszystki ławki pozajmowane. Prowda, że już z technikum wpisały sie ku mie sztyry dziołchy i jedyn synek, ale jak chca śnimi pogodać bez internet, to mi odpisujom dziecka abo wnuki i śmiychu z tego dużo wychodzi, bo jo im pisza za jedno, a łoni mi odpisujom przez „Pan”. Jednak powiym, że fajne to jest, bo do dzisioj bych niy wiedzioł, wiela nas z tyj klasy jeszcze chodzi po świecie, jak dzisioj wyglondo i kaj kery miyszko. To, że niy piszom to osobiście, ni ma sie co dziwować, ta graczka ni ma już dlo mojigo pokolynio, a że jo dycko był wrazidlaty, to ni moga tego od wszystkich żondać. Jednak jest pora takich starzikow, z kerymi sie tom drogom kontaktujymy i to jest piykne.
Odezwało sie do mie dużo znajomych z rostolicznych miejsc na kuli ziymskij i teraz wiym, jak sie im wiedzie i co robiom. Znojdła mie tyż jedna dziołcha, kero pamiynto, jak jo jom na nachtop sodzoł, jak mie już było dziesiyńć lot i mi to przipomniała.
Napisoł do mie tyż jedyn kamrat z Nimiec – Krysiek, kery mie znojd bez ta „Nasza klasa”, że chodziył dycko ze swojom starkom po mlyko pod las, kaj jo miyszkoł i mie pamiynto, chocioż jest dziesiynć lot młodszy. Tak sie skłodo, że jo go pamiyntom i ta jego starka i starzika tyż.
Niy to jednak powod, by o nim pisać tukej, yno Krysiek opisoł mi ciekawe zdarzyni, kere jego starzik mioł z utopkiym przed wojnom, no ale to dopiyro napisza na nastympny tydziyń.