Ropucha sie nadyna luftym i odzywo sie żabskom godkom: – Ty mi tu fotografijkow niy rob, bo mi ich niy trza, zawrzij se lepij te dźwiyrza garażowe...
Jo sie roześmioł i prawia: – Żabo, jo tam nic ni mom takigo, co byś mi urzekła, a zymby mi możesz policzyć, bo w mojich latach to ni ma nic groźnego, ni mo co wypadnyć. (Starka dycko godała, że jak sie żaba uwidzi, to trza gibko gymba zawrzić i niy otwiyrać jom, bo jak łona zymby policzy, to łone chneda wypadnom).
– Godom ci, zawrzij te dźwiyrza, bo dzisioj trzinostego – dalij kludzi chrostawo żaba i podreptała ku grzondce z kwiotkami łobejrzeć eli tam ni ma jakich ślimokow, jo zaś poszoł na zadek chałupy nasiyc tyj trowy dlo kur.
Za chwila jak sie niy serwie wiatrzisko, jakoś tromba wiatrowo sie zrobiyła, choby dwa diobły zatańcowały kole mie.
Skoszono trowa pofurgała wyżyj niż chałupa. Jo gibko uciyk za rog chałupy, a tu jak niy gwizdnie mojimi dźwiyrzami garażowymi, aże szyby w łoknach zabrzynczały. O mały włos dźwiyrze wyleciałyby z cołkimi futrzinami. Skończyło sie na tym, że zawiasy pokrziwiło i niy poradziył żech zawrzić tych dźwiyrzi, trza było poszukać brechy, kero mom zrobiono ze starego świedra grubskigo i je wyciongnyć ze zowiasow. Do wieczora żech zmitrynżył, zanim żech te zawiasy dostoł nazod tak jak były, ale żeby dźwiyrze nazod wsadzić, musioł żech zawołać somsiada, kerymu niy bardzo sie to uśmiychało, bo prawie sie zaczła piyrszo połowa meczu Holandie z Francyjom. Poszło nom to ruk-cug, tak, że nawet jo zdonżył obejrzeć już drugo połowa meczu.
Tak se po tym wszystkim zaczon żech rozmyślać, przeca starzi ludzie dycko zwierzina obserwowali i po jeji zachowaniu poradziyli zmiarkować, czy przidzie jako zmiana pogody, czy tyż niy. Teraz mi sie przipomniało, jak staro Getruda godała, że idzie siano do kupek skłodać, bo chrostawo żaba przidreptała ku progu chałupy i jom spamiyntała, że burza przidzie.
A jo tukej tak zlekcyważił żabsko godka, a przeca jom dobrze rozumia.
Komentarze