Jest żeś w Tunezji i chcesz sie przejechać na kameli i słuchosz jakoś ci blisko godka: – Erwin! Jo na tyj kameli z jednym puklym niy pojada, przeca bych sie czuła chobych siedziała na okolniku, tak jak za dziecka na starzikowym płocie. Spytej sie tego chopa w tym biołym turbanie eli ni majom kamele z dwoma puklami. Byłoby sie czego dzierżeć i siedziała bych choby w mojim zeslu.
– Co ty se Cila myślisz, że ekstra dlo jednyj „kamele” ze Ślonska bydom skludzać tako z dwoma puklami – odpedzioł Erwin.
Jest żeś na Lazurowym Wybrzeżu we Francyji, bo chcesz se obejrzeć ta plaża w Saint-Tropez, a tam juzaś słyszysz naszo godka: – Mareczku idź obejrzi, czy ta woda jest ciepło, bo bych sie chciała trocha pochodzić po krajuszku, a jeszcze mie ta ryma mynczy.
No ja, przeca momy teraz wolność i piykne lotnisko w Pyrzowicach, to niy dziwota, że wszandy idzie zalecieć, trza yno pipiki mieć, bo gdo ni mo miedzi, tyn w doma siedzi – jak dycko starzik prawiył.
Tak mi to teraz prziszło na wspominki, bo rod bych tyż tak polotoł po tych wszystkich nowomodnych kurortach i połoglondoł, jak tam jest, kaj ni moga być skuli tyj starzikowyj przipowiostki.
Człowiek z mojigo pokolynio to inakszy te letni rajzowanie pamiynto. Siadło sie do syrynki abo trabanta i jechało w Polska. Ale jak sie jechało! Wszystko trza było ze sobom brać: namiot, madrace do dmuchanio, maszynki na brynszpyrytus, a jak żeś był bardzij zabrany, to butla z gazym, rostoliczne konserwy i krauzy z miynsym ze zbijanio i rostomajnte inksze jodło dlo cołkij rodziny, bo tam kajś na Mazurach to niy szło nic dostać krom gorzołki i chleba, za kerym tyż sie niyroz w kolejce stoło. Te nasze autoki były zaladowane tak, że resory już niy odbijały i czynsto sie na jakiś dziurawyj drodze auspuf straciyło abo zadni zderzak. Dzieci były małe, to siedziały powciskane miyndzy te klamory i co my kaj zrobiyli haltynsztela, żeby trocha oddychnyć, to potym niy poradziyły sie nazod śmieścić w pojstrzodku. Roz kamratka Rynia, z kerom my dycko jeździyli, kapła sie, że jeji Kondradka ni ma w aucie i wracali my sie nazod dwa kilometry po niego. Niy poradziył wlyść, zatrzas dźwiyrze i oblecioł syrynka z drugij strony, ale Hajnel za tyn czas ruszył i po fertiku.
Komentarze