I tak dejmy na to jak sie pościskosz z brzozkom – musi być młodo, tako, co ni mo jeszcze fest pozmyrszczanyj kory na pniu, to wylyczy ci łona sponiywiyrane nerwy i wroci ci nowe siły i chyńć do życio. Dymb juzaś, jak sie do niego przitulisz, pomoże ci nabrać sił i możność nabranio wiynkszyj pozorności, jak niy poradzisz sie skupić na czymś jednym, yno chodzom ci po łepie wszystki myśli naroz. Krew w żyłach ci tyż dymb poradzi rozruszać, żeby gibcij kronżyła i utlyniyła twój mózg.
Lipa zaś umi cie tak uspokojić, że choćbyś niy wiym jak mioł nerwy poszarpane i do ludzi wiara stracisz, cofnie sie wszystko, że nojwiynkszymu wrogowi poradzisz potym wyboczyć.
Do sosny trza sie przitulać, jak cie kaszel mynczy abo dechu ci brakuje i chyto dychawica, nerwy tyż uspokoji, podobnie jak lipa.
Świyrk dobrze czyni twojim gelynkom i wszelakim bolom rojmatycznym. Dodowo tyż człowiekowi spokojniyjszego patrzynio na świat i pogoda ducha. Jak idzie o jodła, to strom tyn poradzi w człowieku zgasić roztrzyńsione nerwy i zapomi sie przi nij o wszystkich sztresach, kere spotkały cie w robocie czy na drodze. Godajom tyż, że jodła jest stromym kochankow, bo wydowo taki woń tych olejkow yjterycznych, że zaroz sie mo chyńć do błoznowanio i kochanio.
Tak se to Hajnel wzion do serca o tych stromach, a że powadziył sie prawie z babom, siod w niydziela na koło i pojechoł ku Rudom, bo nojprzod chcioł sie przitulić do tego nojstarszego dymba „Cystersa”, kery przi zomku rośnie. Jak go zaczon obłapiać, to taki siły do niego wlazły i krew mu zaczła butlować, że niy było mu rady. Zaczon sie za młodymi dziołchami łoglondać, toż żeby sie uspokojić poszoł ku grubyj lipie z drugij strony zomku rudzkigo, kaj Nepomucek stoji. Poprzituloł sie do lipy i wszystko mu sie zdało piykniejsze, zapomnioł o swadzie w doma. Jak jechoł nazod du dom, to stanył jeszcze w lesie przi chrubyj sośnie i juzaś sie wzion za obłapianie. Jak go uwidzieli młodzi kolorze, kerzi prawie tom drogom jechali do Rud, to sie w czoło klupali. Hajnel sie yno roześmioł i pojechoł ku chałupie.
Ledwo wloz du dom, zaroz sie z babom pogodziył i pogodoł, kaj to dzisioj był i co robiył. Na wieczor jednak niy był już taki wesoły, bo przi myciu namacoł pod parzom jakiś bombelok. Jak sie okozało, chyciył klyszcza, kerego mu jego baba wykrynciyła opaternie. Teraz jest w strachu, czy niy dostanie jakiś choroby i wybiyro sie do dochtora, bo go głowa zaczła boleć, a o przitulaniu do stromow niy chce już słyszeć.
Komentarze