Zachwolka

Dzisioj handlować i niy zbankrocić to trza mieć łeb niy na parada. Wszyndy same konkurynty i trza być fest łobrotnym, żeby utrzimać stałych i zwobić nowych kontmanow do swojigo geszeftu. Co jedyn handlyrz to bardzij wynochwio jakoś promocja abo przecyna na towor, kery ni mo wziyńcio i wszystko wydrukujom na kolorowo w swojich gazetkach i wciepujom kaj yno popadnie abo wciskajom do rynki, jak sie yno przez miasto przeszpacyrujesz. Nawet jak autym stojisz na światłach i mosz okno otwarte, tyż poradzom wciepać ta reklama, a jak stoji auto na parkplacu, to za wyciyraczka tyż papiorki wstyrkajom. Najbardzij jednak mie mo, jak sie chca zdrzymnyć po łobiedzie, żeby trocha sadła zawionzać i ledwo mie spanie chyci, odzywo sie telefon: „Czy zechcom państwo przyjońć zaproszynie na pokaz wełnianych kocy zdrowotnych…” itp. Wszyndy cie zaproszajom, niy przebiyrajom w sposobnościach i promocjami kuszom. Staro cyna przeszkryflnyto czerwonym krziżykiym, chocioż żodyn niy pamiynto, żeby tyn towor mioł kiedy tako cyna, a nowo tako, że niyjedyn ulygnie i kupi.
Tak sie nad tym zastanawiom i kombinuja, skond sie wziyno taki słowo: „promocja”, czy po naszymu taki słowo kiedy było w użyciu?
Prziszol żech na to, że taki promocje miały miejsce już downo, yno człowiek o tym zapomnioł. Żodyn jednak niy godoł na te zachwolani i kuszynie do kupiynio towaru – „promocja”, ale łona była.
Przipominom se, że downij za bajtla handlyry z Raciborza, kere prziwoziyły gymiza na torg do Rybnika, tyż poradziyły promować swój towor. Wołały na kontmanow mniyj wiyncyj tak: „Kupujcie ludzie ta piykno ołberiba – jedyn pynczek za złotek! Kupicie dwa pynczki, to trzeci za darmo na przidowka!”.
Kupiła mamulka trzi pynczki i potym w doma przi obiyraniu do zupy godo: „Widzisz synek, co to za szydzipiyntoki (wydrwigrosze)! Co za wielko zachwolka, a tyn trzeci na przidowka cołki zdrzewiały, żebych go musiała piłom rzazać!”.
Z tego taki wniosek, że downiyjszo zachwolka niczym sie niy różniyła od dzisiejszyj promocje, profit mo yno tyn, kery sprzedowo, chocioż nom sie zdo, że my dobrze trefiyli. Na koniec yno dodom, że ślonsko „zachwolka”, abo tyż „wychwolka”, to nic inkszego jak obecno „promocja”. Szkoda yno, że tym posłom sie niy śpiycho z uznaniym naszyj godki jako ślonskij mowy, bo by my dostowali do skrzinki pocztowyj gazetki z marketow, w keryj by stoło: „Tomaty z zachwolki po 99 groszy za font!”.