Kupa lot tymu nazod, jak dziecka były jeszcze małe, wykombinowali my społu tako gra, że jak kery do pozor, że drugimu je ciynżko na duszy, to mu powiy abo napisze na kartce jakiś dobre słowo. Nasza dziołcha niy poradziła jeszcze wtynczos pisać i padała, że bydzie malować łobrozki. Tak po prowdzie to żech ani wiela niy wierziła, że to chyci, ale dziecka ło tym delszy czos pamiyntały. Roz za czos dostowałach kartki ze wierszykami a malunki, a sama żech tyż ich trocha rozdała. Nojwiyncyj żech sie jednako uśmioła, jak moj przibrany synek koniecznie chcioł mi zrobić radość, ale wymyślani wierszyka szło mu ciynżko. Bezto z naszyj domowyj bibliotyczki wyciongnoł ksionżka ze wierszami, co żech ich miała łogromnie rada, a jedyn cołki przepisoł na kartka i sie pod nim podpisoł. Chocioż wierszyk niy pasowoł do sytuacji, synek skutek łosiongnoł, bo jo żech sie łośmioła! Aż żol mi było, że musiałach mu potym pedzieć, że tak sie niy robi!
Jak żech za bajtla niyrada szła kaj ze starkom, dycki mi przipominała:
– Dziołcha, jak komu niy przajesz, niy pokazuj mu krziwej gymby a zamiast padać mu co złego, lepij życz mu „dobrego dnia”, bo taki człowiek bardzij go potrzebuje niż ty!
Trocha mi to zetrwało, niż żech pokapowała ta starczyno filozofijo, ale jeji rady mi sie potym czynsto we życiu przidały! Na poczontku dziewiydziesiontych lot potrzebowałach trocha przirobić, a założyłach działalność gospodarczo, bezto musiałach wiela łazić po urzyndach, a tam siedziały taki paniczki, co nikedy umiały być fest niyfajne! Moja mało cera niy poradziła tego dycki zdzierżyć, a jedyn roz, jak my już wychodziły, padała na cały głos: – Mama, po co chodzisz do takij babochy.
Na drugi roz miałach strach tam iść, ale urzyndniczka była cołkiym miło, widać se wziyna do serca to, co maluśko padała. Ale kaj sie dało, stosowałach filozofijo mojij starki. Jak kiero paniczka wyskoczyła na mie z gymbom, jo i jeszcze podziynkowała za informacja a życzyłach miłego dnia. Ze poczontku to sie te baby dziwały na mie jak na wariatka, ale potym wiela razy mi tyż same łod sia co doradziły.
Widzicie z tego, że to rychtik działo, bezto radza wom: sprobujcie kerymuś, co wos czasym wkurzo, pedzieć miłego dnia, to wiela niy kosztuje!
Komentarze