U nas w doma ludzie na Godni Świynta czekajom już łod września. Naszym dzieckom to łostało jeszcze ze szkolnych lot. To był taki piyrszy przistanek, kaj szkolorz chocioż pora dni mioł gowa frajno łod nauki, ku tymu jeszcze dostoł „dzieciontko”, a mogł tyż łobejrzeć strzylani na silwestra! Potym dali to szło ku zimowym feryjom, za nimi ku Wielkanocy, a na koniec ku wielgim feryjom, co się zaczynajom we czyrwniu.
Łostatni tydziyń przed Wilijom to było dycki kupa warzynio a pieczynio. Co żech mogła, to żech se przirychtowała do przodku. Bo tyż musza prziznać, że choć my som prawe Ślonzoki, to my sie wiela nauczyli łod naszych somsiadow. Na Nowy Rok dycki warzymy bigos podle przepisu łod starki Szczyglinej. Czasym robiymy krokiety jak pani Aniela Pokusko, co sie wychowała u klosztornych paniyn we Belgiji, we drugi świynto na łobiod ku nim momy zawdy czysty barszcz, ale nojważniejszo je do nos dycki Wilijo a nasze ślonske jodło. Hań downi na Wilijo godało sie Szczodry wieczor. Bo tyn wieczor był rychtik szczodry po to, coby nowy roczek, co mioł dziepiyro nastać, tyż taki był, a ludziom sie dobrze wiodło! Nigdych niy liczyła, eli je u nos aż dwanoście dań, jak u moji starki w doma, ale dycki na stole je zupa ze prawych grzibow, poganka ze grzibowom zołzom a konopiotka, co mój chop rod jodo. Jedni wolom kapusta ze grzibami, drudzy ze grochym. Ryby tyż momy roztomańte: my ze chopym niy umiymy se przedstawić Wilije bez kapra, ale nasze dziecka (teroz już wielgie!) dycki chcieli „pływajonce kostki”, czyli filety. Je tyż słodki jodło: moczka, bryja ze gruszek, makowki, piernik a roztomańte kołocze. Po Wiliji se wszyjscy powrożymy ze łorzechow a jabek, jaki bydymy mieć nowy rok, a potym już łobowionzkowo bez poł godziny śpiywomy kolyndy przi harmoszce, co na ni gro nasz tatulek. Dziepiyro na koniec dowomy se podaronki. Dycki nojmłodszy bajtel we familiji bawił sie we Dziecionteczko, a gyszynki spod choinki wszystkim dorynczoł. Roz było skuli tego kupa śmiychu, bo synek niy patrzoł, co na skrzince pisze, yno dowoł jak leciało.
Takich piyknych Świont życza Wszystkim!
Komentarze