- Toć dziołcho było - to prowda! Spałaś jeszcze w kolybce i jak zatrzynsło, toś sie łobudziyła i jyna wrzeszczeć wniebogłosy. Jo prawie z Antosiym chodziyła i myślałach, że to już koniec świata. Starka zaczli zaroz godzinki śpiywać. W laubie coś trzasło i starka zaroz rynce do gory dźwigli, za łeb sie chycili i lamyńcić głośno zaczli: Jezderkusie! Już żech masła nadziałała, cołko maśniczka ze śmietonkom z ławy na ziym spadła i na ograbki sie rozleciała. Korluszko i bijok yno cołkie łostały. Koty i psy se pomaszkieciły, a my masło suchym pyskiym zjedli. W Rybniku, w tych murowanych chałupach szyby powylatowały. Jednymu chopu noga złomało, bo cołki rog z chałupy sie przewrociył. W naszyj staryj chałupie yno balki zatrzeszczały i na strachu sie skończyło, a ty mi tu o murowanyj chałupie yno brnisz.- Wy juzaś swojigo bronicie. Co to mo do tego? Jo yno chca lepij miyszkać. Juzaś na zima bydymy z gowiedziom spać.- Po piyrsze dziołcho, krowy to niy gowiydź, a po drugi - to wolisz marznyć? Przeca yno dźwiyrze do chlywa otwiyromy, coby nom krowy nachuchały do izby.- Wiym i niy chca marznyć, ale potym sie ludzie w kościele od nos cofiom, cołko Smolno w kościele osobno stoji.- Wiysz Anusia! Niy nerwuj mie! Jak sie wydosz i bydziesz miała tela dziecek jak jo, to ci sie niyroz ta nasza godka przipomni i sama uznosz, kto mioł recht. Co zaś idzie o tych, co sie w kościele od nas cofiom, to ci yno tela powiym: niy pamiynto woł, jak cielyńciym boł. Już rybniczany widać zapomnieli, jak im ludzie ze Smolnyj pomogli. W starym kościele sie im dzwon urwoł, przelecioł przez powała i spod na ziym w kościele. Wiyźli potym tyn pynknyty dzwon aże do Opawy, żeby nowy odloć. Mocka piniyndzy to kosztowało i zbiyrali na tyn nowy, wiynkszy dzwon. Wtedy im te talary ze Smolnyj niy śmierdziały?- Jak se tak wszystko rozwoża, to mi czasym przidzie taki pomyślunek, że wy mamulko wszystko umicie człowiekowi tak wytuplikować i mądry z wos człowiek, że byście mogli fojtym być w naszyj gminie, tela że baby to by na pewno niy dopuściyli na taki urząd. Na pewno by my mieli tu downo nowo szkoła na Smolnyj.- Powiym ci yno tela dziołcho, że szkoły tam pryndko niy bydymy mieli. W Rybniku sie nojwiyncyj te Nimce roztopyrczajom i coroz wiyncyj swojich przepisow i swojij mody nom tu wkludzajom. Już trzi browary postawiyli, bo chcom z naszych chopow samych naprańcow zrobić. Przeca napraniec to cołki czas mo łeb zbamoncono i o to im sie rozchodzi, gupi Ślązok niy bydzie sie cis do rządzynio, a do roboty sie nado. Na szkole dlo Ślązokow na pewno im niy zależy. Szczyńści, że jeszcze rechtorow polskich niy powyciepowali, chocioż i do tego chyba dońdzie. Dziecka już i tak po nimiecku szwandrajom, chocioż ich Poloki uczom. W magistracie tyż same Niymce już siedzom i pociongajom za te nojważniyjsze postronki, a polski hampelmany muszom skokać, tak jak im kożom. Za chwila nasza gmina prziłączom do Rybnika i dopiyro bydymy mieć psińco. Na razie momy naszego fojta, kery sie im niy do za nos kludzić, ale wszystkigo tyż som niy poradzi utrzimać. Sama widzisz, co sie robi i jak jest.
Komentarze