20033302
20033302
– Co tyż to za gańba? Dyć Starka mi godali kiejsik, że wyście sie wydowali, a za dwa miesiące chrzciny były.– To były inksze czasy. Tego ci starka niy godali, że mi bronili za taty sie wydować? Takigo biydoka mi niy przikludzej do chałupy – godali ciyngiym. Co jo za to mogła, że łon yno dwie morgi łąki dostoł. I tak to było dużo, jak jeszcze sztyry młodsze siostry trza było podzielić. Co my mieli robić, kiej my sie przoli na zabój.– Niy starejcie sie mamulko, jo wom na pewno takij gańby niy zrobia jak Ula.


Tak se pogadowała matka z cerom, kere miyszkały na Smolnyj, a bydzie już tymu chneda ze sto sztyrdzieści lot.Anusia ze Smolnyj była szwarnom frelkom i chocioż wypol śnij był wielki, to wszyjscy wtedy godali, że nojpiykniejszom jest dziołchom na cołkij wsi Smolno. W wojsku, kere tam wtedy kwatyrowało, tyż niy brakowało sztramskich karlusow. Jedyn śnich, wyzgierny rajter, o kerym Anusia mamulce prawiyła, zgup za niom do imyntu. Ludwik mu było na miano i był już wtedy starszym gefrajtrym. Anusi sie tyż siarońsko podoboł, ale niy pokazowała tego po sobie. Chocioż była jeszcze fest młodo, to jednak sie niy dała tak gibko zbamońcić, bo tyż była szprytno bestyjka. Pasła dycko krowy na łące miyndzy Gaciom a Wrzosami, Niwa na te pastwiska godali. Wszyjscy gospodorze ze Smolnyj mogli tam swoji bydło wyposać, bo było to wtedy niczyje.Paśli tam z Anusiom swoje krasule i gwiazdule, dziołchy i synki z cołkij wsi. Wydziwiali rostoliczne gupoty pospołu, tak jak to dycko bywo, jak sie poru synków z dziołchami trefi. Nojwiyncyj tych gupot to Anusia snochwiała, a teraz dziepiyro miała sposobność wydziwiać, bo przeca wojoki byli na kwatyrze we dworze. Przikludzali swoje konie na Niwa, żeby ich tyż popaś, a przi tym dziywkom przigadowali. Niyjedyn tam dziołcha zbamońciył, potym zostawiył i zaś za inkszom sie uganioł. Wetowali sie miyndzy sobom, kery wiyncyj dziywek zbamońci.Z Anusiom jednak tak lekko im niy szło. To łona ich za błozna robiyła i za nos wodziła. Co chwila im snochwiała jakiś nowe gupoty do zrobiynio, a że była nojgryfniejszo, toż i wszyjscy nadskakowali i zabiygali co jedyn to bardzij. Roz im kozała iść do lasa na grziby – kery nojwiyncyj nazbiyro, tymu do sie pocałować. Zbiyrali boroki poł dnia te grziby i jak prziśli z lasa, to Anusia kozała je wszystkim po koleji do trowniczki wysuć, żeby je porachować. Rachowała i ciepała na hołda, osobno zdrowe i osobno chrobawe. Tak to wymaniyła, że tych chrobawych było zatrzyńsiyni, a zdrowych od kożdego yno po trzi policzyła, potym sie roześmioła i pedziała:– Żodyn niy dostanie kusku, bo kożdy mo jednako tych grzibow, yno po trzi, a reszta do wyciepanio. Za trzi grziby to niy werce żodnymu z was dować sie cmuknyć. Jutro przidźcie, to możno sie wom udo wygrać w inkszych zawodach.Na drugi dziyń zaś wojokom wymyśliła coś inkszego, ale nigdy żodyn niy poradziył wygrać, bo tak dycko trefiyło, że niy szło pokozać, kto rychtyk zostoł tym niypokonanym. Tak ich szprytno Anusia za manusia poradziyła zrobić.

Komentarze

Dodaj komentarz