Wczora, zaroz po siodmej, do naszego biura wleciała znerwowano Tilka a łod dżwiyrzy wołała:
– Dziołchy, niy uwierzicie, co mi sie dzisio przidarziło, jak żech wczas rano leciała na autobus! We tym familoku, co my kejś ze Elkom miyszkały, na balkonie na piyrszym sztoku stoł sagi chop!
– Jo zaroz dzwonia na policyjo! – padała nasza szefowo, co miała chopa policjanta. – To musi być tyn zboczyniec, co go synki już dwa tydnie szukajom...
Tilka chciała i pedzieć, coby tego niy robiła, ale Bernadka niy dopuściła jom do słowa.
Za kwila był u nas taki mody policjon a wzion sie do przepytanio Tilki. Co rusz i godoł, że mo łodpowiadać na pytania, a niy łozprowiać ło beleczym!
– Na kerym balkonie to było? –spytoł sie.
– Na drugim abo na trzecim łod prawej strony – zgodnie z prowdom łodpedziała Tilka.
– Widzieli żeście go babeczko wyraźnie?
– Tak, jak wos widza panoczku, tyn chop stoł na stołku a rynce dźwigoł do gory, yno...
Policjon już dalij niy słuchoł, yno kajś zadzwonił a wszystek, co sie dowiedzioł, kerymuś pogodoł.
Tilka niy patrzała już na nic, yno chyciła tego młodzioka za ramie a nim potrzonsła:
– Posłuchejcie mie chopie, noreście! – padała. – Tyn chop na balkonie niy był tak cołkiym sagi, bo mioł taki mikroskopowe czorne badki, a padom to wom bezto, cobych za krziwe przisiongani do sondu ciogniynto niy była!
Co było dali, to my sie dowiedzieli dziepiyro dzisio rano łod naszej Bernadki.
Policjanty podjechali pod familok a skoczyli do pojstrzodka. Tyn trzeci balkon noleżoł do takich dwóch starkow, co ledwa łaziły, to dali im pokoj, ale jak zadzwonili pod tyn drugi adres, to łotworził im chop we badkach, no to łoni go łaps! To sie potym tyn panoczek gynsto tłumaczył, a bezmała było to tak: mioł iść z rana za robotom, bezto wyciongnoł ze szranku ancug, ale łon trocha zalatowoł kulkami na mole, bezto wynios go na balkon. Jeszcze niy wloz do dom, a tu patrzi a jego szaket leci do gory! Kapnoł sie, że keryś mu go kradnie, bez to ciepnoł sie go retować! Podskoczył, rynkami do niego dostoł, ale ściongnońć go niy poradził! Musioł iść po stołek...
Chop mioł alibi: na balkonie policjanty znodli hoczyk łod wyndki a pora metrow żyłki.
Komentarze