Dobro obrona zapewniały ji rozległe barzoły i rozlywiska rzyczne. Swoja warownia postawiył na usypanyj doś wysokij kympie ziymi. Wysoko na jaki piytnoście metrow drzewianno wieża i wielko chałupa z trzech stron były otoczone głymbokom przikopom, a z połedniowyj strony dostympu broniła rzyka Sumina, szyroko rozloto na bagnistych łąkach. Krom tego wszystko ogrodzone było szpiciatymi palami, a wjyżdżało sie przez wysoki, ciynżki, dymbowe wrota, kere sztyjc zawarte były na sztyry spusty. Stoło tyż na tym zagrodzonym placu pora myjnszych chałup drzewiannych, chlywow i stodoł. Wieża rycersko, kero nad wszystkimi budowlami krolowała, miała aże trzi sztoki. Na samym dole były komory i magazyny na rostoliczne klamory gospodarski, zaś na piyrszym sztoku były pomiyszkania. W jednyj izbie stoł piykny kachlok, na kerego kachlach były malonki smokow i orłow. Były to znaki rodowe krola Czechow, kerymu wtedy podlegało ksiynstwo raciborski. Z nojwyższego sztoku wieży szło patrzeć na nojbliższe okolice i reskiyrować obronom cołkigo obyńścio, jakby już doszło do jakigo napadu.Do Bożyj Góry Waniek skludził osadnikow, kerzi zaczli ziymia obrobiać, stawy rybne zakłodać i korzystać z tego, co dowoł las, kery cołko dolina Suminy otoczoł. Nad samom rzykom larmowało wielki koło młyński, kere krynciło srogimi żarnami i mloło sie na nich obiyle. W lasach smolorze wypolali wągel drzewny i robiyli smoła, kerom sie szmarowało szyndzioły na dachach i okolniki przi płotach. Było tyż kupa szyndzielorzy w Bożyj Górze i strugane przez nich szyndzioły z bukowego drzewa były dobrym towarym handlowym – totyż z daleka po nie jeździyli kupcy i rostoliczni handlyrze. Grodzisko stoło na szlaku handlowym, czynsto wiync go odwiedzali wspomniani handlyrze. Co jakiś czas drogom od Raciborza ciongły cołki karawany tych kupcow i rozliczne pielgrzimki do klasztoru w Rudach. Do obowiązku rycerzy osiadłych w Bożyj Górze należało ochroniani kupcow i pątnikow przed bandami, kerych pełno wtedy naplongło sie na tych terynach.Jednak z czasym Wańkowi coroz bardzij sie niy podobało taki liche życie rycerski i szukoł sposobności na lekki zarobek. Coroz wiynksze podatki żądoł od osiadłych pamponi i coroz wiyncyj chcioł od przejyżdżajoncych kupcow za ochrona.Po jakimś czasie som zaczon napadać na okoliczne miejscowości i łupiył, co popadnie. Kole niego zaczli sie zbiyrac sami podobni do niego – rostoliczne rabczyki i szumowiny, kerzi tyż szukali lekkigo zarobku. Waniek zostoł ich hersztym i nazywali go Biesym i Kregulcym, bo tyż tak jak kregul cicho i zniynacka w blyszczoncyj zbroji spadoł na swoji ofiary.
Komentarze