Ludzie ze strachu sami wystawiali przed swoji chałupki wszystko, co nojlepszego mieli, jak yno usłyszeli daleki dudniyni końskich kopyt. Niyroz było to prosia, baran, garniec miodu i masła, a niyroz ostatnio krowa żywicielka. Ni mioł litości Waniek nad nikim, a już nojbardzij nad takim gospodorzym, kery staroł sie schować przed nim swój dobytek. Tak tyż banda Kregulca niy musiała sie starać o jedzynie i picie. Tym, kerzi sie podporządkować niy chcieli, polili chałupy i stodoły, coby nauczka im dać. Groził śmierciom na dokłodka, jakby sie na drugi roz wymigać od okupu chcieli. Młode dziywki tyż darowane ni miały i musiały przed bandziorami w lasach na bagnistych rozlywiskach rzyki Suminki sie chować, tam kaj konie przejechać niy poradziły.W okolicznych wsiach czynsto biły dzwony na trwoga, jak Waniek ze swojom bandom sie zbliżoł. Jedna z pobliskich wiosek nazwali Zwonowice skuli tego czynstego dzwoniynio na alarm. Zaś we wiosce za Zwonowicami, kaj Kregulec dycko nojmynij okupu dostowoł, bo gospodorze dobytek pod słoma w somsiekach chowali, spolił wszystki stodoły. Nazwali potym ta wieś Stodoły.Handlyrze i wandrowniki z daleka omijali te teryny, kaj Waniek grasowoł, ale niy zawsze sie im udało, bo ludzie Kregulca mieli tyż szpiegow po wioskach, kerzi donosili im o przejyżdżających karawanach kupieckich.Jedyn roz tyż przejyżdżali szlakiym do Rud wozy żydowskich kupczykow, kerzi niy wiedzieli o tym, co ich tu czeko, bo z daleka pochodzili. Kregul napod na nich ze swojom bandom, wszystkich wymordowoł i pozbiyroł wszystko, co było coś we wercie. Miejsce, w kerym sie to stało, zaczli niyskorzij Żydowinom mianować, zaś Bożo Góra nazywali zwyczajnie Górkami, bo skuli takij złyj opinie, jako miało te siedlisko rycerza-rabczyka, niy pasowało Boga ku tymu przibiyrać.Prziszła jednak „kryska na matyska”, Książe raciborski, kery wielki szkody ponosiył skuli tych rabusiow, niyroz sie zastanowioł, jak pokonać takigo groźnego przeciwnika. Pod przikrywkom polowanio na grubo zwierzina ściągnył kupa rycerzow z Czech, zebroł tyż swojich rycerzow i zrobił porządek w Bożyj Górze. Siedlisko Biesa zostało zdobyte, spolone i zrownane z ziymiom, a som Kregulec zginył trefiony strzałom w serce. Po śmierci Wańka na tym miejscu osiedlyły sie sztyry rodziny. Jedyn śnich, osadnik, kery sie nazywoł Czerny, zaczon obrobiać ziymia niydaleko tego pogorzeliska. Drugi, Kałuża, zaczon stawiać swoja chałupa kole rozlywiska Suminy, zaś rodzina Machnik zaczła gospodarzić miyndzy Suminom a krajym lasa. Ostatni osadnik, Górecki, osiedlił sie na zalesionych kympach z północnyj strony miejscowości Górki.
Komentarze