Łostatnio potkałach kamratka, co my społu do liceum chodziły. Bezto była prziwilijo pogodać łod serca:
– Ty mie dziołcho znosz a wiysz, że jo zwierzom przaja – zaczła Lidka. – Ale teroz mie spotkała tako gańba, że tego strowić niy poradza! Keryś nasłoł na mie policyjo, że jo ło moji psy niy dbom... a nasza somsiadka sama godo, że u nos Misiek a Żabka majom sie lepi jako kaj indzi dziecka! Było to tak: nasi psi zrobili podkop, a potym lotali po drodze, cołki szczyńści, że sie nic niy stało! Jak za pora dni wykopali nowy, trza ich było uwionzać ku budzie. Bo chocioż miyszkomy na bocznej drodze, to wele nos chodzom dziecka do szkoły! Nojwiyncy to sie niy widziało naszej Żabce i jak sie i spomniało, że je uwionzano, to poradziła na cołki głos labiydzić, podwiel jom co nowego niy zainteresowało! Łoroz u nas na placu zaczły sie dzioć roztomańte rzeczy: gdoś psioki spuścił ze łańcucha abo łotwarł im furtka, straciły sie miski na woda, a na furtce nom napisali „nie dręcz zwierzont”! Jo już wtynczos miała iść na policyjo, ale Jorguś padoł, że to som yno taki „wybryki” łod szkolorzy a chnet sie im zmierznie! Potym było tydziyń pokoj, bo psi skuli dyszcza mało byli na placu, a jak sie łociepliło, prziszła policyjo... Pogodali sy mnom a mojim chopym a we raporcie napisali, że wszystek je we porzondku, ale niy dalij jak wczora prziszli po drugi jakiś dwa insze policjanty a pytali się, kaj mom psy, bo ich somsiady niy widzom... Powiydź sama, czy to niy idzie czegoś do gowy dostać? Teroz już chocioż wiym, jako to sie stało! Szkolorze polecieli ze skargom do dyrektorki, że momy psy na lańcuchu, a łona zamiast się przekonać, co się dzieje, chyciła yno za komorka... Jo tyż dalij je za tym, że trza dzieckom pedzieć, coby padali łojcom abo we szkole, jak sie zwierzowi dzieje krziwda! Jednako mieliby tyż wiedzieć, że po piyrsze, taki graczki za Janosika a spuszczani psow to sie może do nich źle skończyć, a po drugi trza im padać, że tyn, co mo psa, mo tyż łobowionzki. Musi zadbać, coby kerego niy ugryz!
Kejś dzieckom nagodali, jaki majom we szkole prawa, ale ło łobowiozkach to żodyn niy muknoł... A teroz za to pokutujymy!
Komentarze