Te przisłowie wszyjscy znajom, ale go we życiu niy stosujom! Ludzie by chcieli, coby lekko a bez roboty zarobić, a potym se kupić, co yno serce zapragnie, ale ze tym ni ma tak łaps! Jak ni mosz ciotki abo ujka we Ameryce, cobyś co po nich mog zerbować, a chcesz do czego dońś, to musisz pozawijać rynkowy a wziońć sie za robota!
Już słysza, jak nikerzi godajom co inszego, ale pamiyntejcie se, że co łukradzione, ni ma pobłogosławione! Moja starka dycki godała: ty komu ronczkom a dioboł ci całym miechym...
Weselny fajer łojcowie łod moji kuzynki zrobili we piyknej restauracyji, chocioż we tamtych czasach taki rzeczy zaczynały dziepiyro być modne. Tam obsługowoł nos jedyn mody kelner, co był troszka starszy jako jo. Gryfnie mu to szło, ale nojwiyncy mi sie podobało, że do kożdego mioł dobre słowo. Jo tam mało we restauracyjach przebywała, a zwykow, żech niy znała, ale mój tatulek wiedzioł, co sie komu noleży i jak my szli do dom, podziynkowoł tymu modymu za dobro łobsługa. Synek sie uradowoł a doł sie na kwila ze mojimi łojcami do godki:
– Kelnerowani to je robota jak kożdo inszo – godoł – ale jak żech sie podjon, to jom musza zrobić dobrze a dokludzić do końca! Wiycie, chciołbych za pora lot mieć swój lokal a byłbych rod, jakby ludzie mojim kelnerom za dobro obsługa, tak jak Wy dzisio, dziynkowali!
Co pamiyntom, to łon jeszcze bez pora lot we tyj samej restauracyji robił, podwiel i niy zawrzili. Kożdo niydziela po drodze do kościoła dziwali my sie na tyn lokal, co potym yno straszył powybijanymi szybami.
Tak ze dwa lata nazod byli my cołkom familijom na Jurze, a po drodze wleźli my co zjeś do taki piyknej restauracyji pod lasym. Bołach sie, że tam bydzie drogo, ale moji dziecka mie przegodali:
– A kaj to podziecie, mamo, jak nojbliższy bar bydzie dziepiyro za dwaścia kilometrow, a do tego jeszcze niy po drodze!
Jodło było dobre, a potym prziszoł ku nom som „szef”. Jo go zaroz poznała, to był tyn kelner, co my go czasym spominali. Padoł, że jak uwidzioł auto ze żorskom rejestracjom, to se zaroz spomnioł mojigo tatulka, co mu kejś padoł: Mosz prawie chopie, gdo chce furmanić, musi se niy ganić!
Komentarze