Serwetkowe majtki

Jednego roku babcia Wanda ze Warszawy zaprosiła do sia cołko familijo Pociaskow, bezto Waldusiowo starka Frida tyż tam pojechała, ale ciynżko miała te pora dni przetrwać, bo sie ze drugom starkom niy poradziła dogodać! Wandzie porzad sie zdało, że we Warszawie wszystek majom lepsze a bardzij nowomodne, bezto sztyjc Fridzie cosikej wytykała, że źle robi! Jejich wnuczek był mały, ale niy gupi, bezto wiedzioł, że łon musi miyndzy starki wkroczyć! Syneczek sie fest nagimnastykowoł, som starkom robił kawa, chocio mu mamulka to zakozowała, bo sie mog tyn mały gist łoparzić! Sztyjc cosikej wynokwioł, ale starki porzad na sia sie boczyły! Jednako dziyń przed wyjazdym do chałpy, sprawa rozwionzała sie sama. Bajtel wloz do łaziynki, coby se umyć rynce. Mioł przi sobie taki kauczukowy balik, co sie piyknie łodbijoł łod twardego i łon mu wpod do babcinej kastle na zmazane prani. Waldik jom przekipnoł, wyciep wszystek na delina a zaczon miyndzy szworami szukać swojego balika. Łoroz trefił na cosikej dziwacznego: wyglondało jak majtki, ale cołki było ze bordowej szpicki. Tako sama szpicka to starka Frida miała przi serwetkach, co ich dowała we niedziela na stoł. Bajtel w migu łodkryncił sztyl łod mietły, powiesił na nim te dziwaczne galotki a skoczył śnimi ku babci Wandzie prosto do salonu, kaj łona popijała kawa ze kamratkami a ze starkom Fridom!
– Babciu, łod kogo som te serwetkowe majtki?! – wrzasknoł na cołki głos, a nimi powinkowoł.
Wanda rozpoliła sie jak szyna, a jeji kamratki forskły śmiychym, ale zaroz potym padały, że sie muszom już brać do dom i jedna bez drugo ciepły sie ku dźwiyrzom ! Niy pomogło ani to, że Wanda ich fest za wnukowe breweryje przeproszała. Za to Frida była łogromnie rada, bo noreście mogła Wandzie przigodać, że tako rzecz to by sie u nos, na Ślonsku niy stała, bo nasze baby porzodne som a we serwetkowych galotkach niy chodzom!
I tak Walduś łobie starki pogodził.

Baner reklamowy

Komentarze

Dodaj komentarz