Szkolno wymiana ze Francyje / Grymlino
Szkolno wymiana ze Francyje / Grymlino

Angielski to umiała „na blacha”, ale cołkiym dobrze tyż ji szło ze francuskigo. Isto tyż cosik erbła po tyj swoji starce, tyj Francoise, co jōm ôjciec ôd jejigo tatulka ze drugi wojny prziwiōz. We Polsce sie śniōm ôżynił a dochowali sie piyńć dziecek. Zuzka dostała sie wtynczos na wymiana uczniōw do Francyje, do taki familije, co miyszkała kōnsek ôd Paryża. Ci istni sie ji potym kwolili, że starka ôd jejich starzika bōła ze naszego Krakowa. Tam se dziołcha poôglōndała światu: we takim wielgim muzejōm bōła, kaj pōłno roztōmańtych malōnkōw wisiało a figurōw stoło. Po tyj wielgi rzyce, co bez tyn Paryż płynie takim małym szifym pływała bez pora godzin, a pōłno fotografijōw do dōm nawiozła. A za dwa tydnie przijechała ku ni tak francusko kamratka. Ta dziołcha sie troszka dziwowała, że u nos tyż je tak, jak we tyj Francyji, bo ôna se myślała, że sam ludzie we PGR-ach robiōm, wody w dōma ni majōm a bez żerdka srajōm! Takich gupot nagodoł ji jedyn jejich sōmsiod , co we sześdziesiōntych latach roz we Polsce bōł. Ôjcowie ôd Zuzki zawioźli ta modo Francuzka do Krakowa a do Czynstochowy. Tam to sie ji fest widziało, chociaż ôna do kościoła niy chodziyła. Jedyn roz ta dziołszka musiała ôstać w dōma ze Zuzczynōm starkōm, bo Zuzka musiała niyspodzianie pojechać kajś na pora godzin. Dziołcha wszystek tyj Francuzce pedziała, kaj jedzie i kej bydzie nazod, a do tego czasu wszyjstek tyj dziołsze miała dać Zuzczyno starka, co po francusku niy rozumiała ani słowa. Tyj Francuzce to niy wadziło, bo sie cołkiym dobrze dogadowała ze starkōm rynkami. Śniodani bōło dobre, ale starce sie zdało, że ta modo mało zjadła i chciała ji dać jeszcze kitka ze kury, co przirychtowała ku ôbiedzie, ale ôna sie ôganiała a pokozowała na kark, jako to robiōm nasze chopy, jak wypić co ôstrzyjszego zamiarujōm, no to starka zgupiała! Zaczła rynce rozkłodać a godać, że taki mode dziołchy u nos gorzoły niy pijōm, ale jak już ji bōło tego zatela, to zazwōniła do wnuczki, a ta ji dziepiyro pedziała, że jeji kamratka niy chce gorzoły, yno pokazuje, że starka jōm nafutrowała, aż pod sōm kark!

Baner reklamowy

Komentarze

Dodaj komentarz