Moja starka dycki godała tak: Taki to se yno myśli, że sam go cosik żgo, a tam go pcho, we gowie mu tōmpie, we brzuchu puczy, a ze zadku mu lajerka gro! Taki ôbrozek piykny ni ma, a tak do ścisłości muszymy padać, że jeszcze taki borok wszyjskim naôkoło na nerwach zagrać poradzi. Bo mu sie porzad zdo, że ônego, co je ciynżko chory, niy flyjgujōm, jako by sie noleżało.
Wele siostrōw ôd moji starki mieszkali taki Skurziki – chop a baba. Dziecek niy mieli, bezto na staroś yno sami ôstali. Skurziczka sie we wekslach fest rozniymōgła i ani wiela zrobić już na gospodarce niy poradziyła. A jeji chop Jōzef, to bōł taki kōń, co to we pojedinka niy ciōngnōł i ôn sie tyż zaroz chory zrobiył.! Jak Ana padała, że jōm, co boli, to ônego dycki bolało ze sto razy wiyncy. Ôna sie już ledwie po chałpie wlykła, a jeszcze mu wszyjstek w dōma, jak trza bōło, wyrychtowała, bo przeca fest chory bōł!
A ôn po kaczmach sztyjc lotoł, a babie godoł, że mu dochtōr wiyncy ruchu na nerwy zalyciył. Ana bōła coroz słabszo, a jednego dnia już niy stanyła! Roztōmiły Jōzefek sōm ôstoł, yno ze dziywkōm Marynōm, co już delszy czos u nich robiyła, a wiedziała, co sie we tyj chałpie świynci! Po pogrzebie sie ôroz gospodorz jeszcze wiyncy rozniymōg, a cołko robota chcioł sfalić na Maryna, ale ōna gupio niy bōła! Kamratōm sie Skurzik uskargowoł, że ôn już wiela niy pociōngnie, bo jego baba zdrowszo ōd niygo bōła, a wziyna i umrziła! I richtik chop we ôczach sie traciył, bo ôgromnie schudnōł. Jak Maryna szła do pola, to jodła niy nawarziła, a Jōzefek mioł dwie lewe rynce, bezto woloł głōd ciyrpieć niż roboty sie chycić! Jak ta metoda niy pomōgła, Maryna zaczła s inkszej beczki. Padała gospodorzowi, że ôgromnie źle wyglōndo i miołby sie rychtować we ta ôstatnio drōga, a chciała po nim, coby ji doł cołki swoji szactwo! Bo już go potrzebować niy bydzie, a jejimu galanowi, to te wszyjski łachy bydōm w sōm roz pasowały! To miała być tako prymijo za dobro robota. Jōzef sie wściek, a nogle ôzdrowioł! Maryna zaroz wygnoł, skuli tego mioł tela roboty, że ô chorōbskach zapōmnioł!
Komentarze