Chyba ni ma takigo, kiery by w tym jedinym takim dniu w roku nie wracoł pamiynciom do tych lot, kiedy był bajtlym. Choby na jakim zwolniōnym filmie, wrocajōm do nos ôbrozki z tamtych lot i zaś widzimy mama kiero uwijo sie w kuchni i taty kiery niesie krisbaum do chałpy. Tak se padōm, że zgodzicie się zy mnom, że tak dobrego jodła jak rychtowały nasze mamulki, to sie już potym nigdy nikaj nie jadło.
Kołocz z marmuladōm z gruszczanych pieczek
Dwa dni przed Wilijōm, moja mama dycko piykła kołocze i roztomańte pierniki. Chciałach tu pedzieć, że u nos godało sie pierniki na wszelajaki ciastka. Krōm kołocza z makiym, syrym i posypkōm, piykła też kołocz z marmuladōm z gruszczanych pieczek, czyli suszonych gruszek, na kiery dōm wōm przepis.
Składniki na ciasto: 40 dag pszynicznej mōnki, 10 dag masła, 2 jajka, 8 dag cukru, 4 dag drożdży, ¾ szklanki mlyka, szczypta soli, tłuszcz do szmarowanio blachy. Marmulada: uwarzić (ugotować) ½ kg gruszczanych pieczek. Jeżeli majōm szypułki i ôgōnki, to ich powyciągać. Uwarzōne pieczki zemleć na maszynce. Dodać trocha przewarzōnej wody, jeżeli trzeba to dosłodzić. Idzie też dodać troszyczka mletej skōrzice abo żobyczkōw, jak kto woli. Jo niczego nie dodowōm. Wszystko dokładnie wymiyszać, żeby była jednolito masa.
Składniki: skōrzica - cynamon, żobyczki - gożdziki; posypka: 20 dag pszynicznej mōnki, 1 jajko, 1 żōłtko, 10 dag cukru, 10 dag masła, ½ paczki wanilcukru.
Piyrsze uwarzić gruszczane pieczki i zrobić z nich marmulada. Potym zarobić ciasto drożdżowe. Zamias drożdżowego, może być pōłkruche. Zagniyść posypka. Wyrośniōne ciasto drożdżowe wyłożyć na blacha, wyrównać, poczekać aż podrośnie, jeszcze roz wyrównać, dać marmulada z pieczek, ugarnirować posypkōm i piyc w tymp. 180 stopni, około 40 – 50 minut. Jak posypka zacznie brōnotnieć, kołocz jest upieczōny.
Makrōny z hawerflokōw, czyli płatków owsianych
Składniki: 40 dag hawerflokōw, 20 dag masła, 20 dag cukru, 2 jajka, 2 łyżki pszynicznej mōnki, sok i otarto skōrka z jednej citrōny abo olejek migdałowy, proszek do pieczynio. Zmiksować jajka, masło i cukier, dodać hawerfloki, mōnka, proszek i arōmaty. Zagnieść ciasto. Formować małe makrōny i piyc w 150 C, aż sie zacznōm rumiynić.
Karp w zōłzie (w sosie)
Dziyń przed Wilijom przirychtować kapra. Ôszkrobać go z łusek, posolić i obłożyć pokrotōm cebulōm. We Wilijo opłukać, skropić sokiym z citrōny i ôkulać w mōnce. W brytfance roztopić masło i ôbsmarzić ryba. Wloć maślōnka, tela, żeby przikryć ryba. Dodać pora kulek wōniōncego zielo. Warzić pora minut, zagynścić mōnkōm, dodać śłodkij śmietōnki, posolić do smaku. Posypać tartym piernikiym.
Bryja
Bryja warzi sie ze suszōnych owocōw. Mogōm to być jabka, śliwki abo gruszki. Moja mama warziła bryja ze suszōnych śliwek. Suszōne śliwki ôpłōkać i namoczyć we wodzie. Warzić w tej samej wodzie na słabym ôgniu i dować pozōr, żeby sie nie przipoliły. Zagynścić mōnkōm, dodać słodkij śmietōnki. Doprawić cukrym, solōm i skōrzicōm. Jeść na gorąco. Smacznego.
Komentarze