– Co ci to jest, ani na piwo niy przidziesz do baru, yno cołki czas w tyj zegrodzie dłubiesz i dłubiesz!– Chopie...! Ani sie niy pytej, te pieroński krety mie wykończom.Alojzym aż szarpło, bo myśloł, że zaś coś na grubiorzow bydzie godoł, ale wejrzoł przez płot na hajnelow trownik, kery mu dycko przeciepuje Lyjna, jego ślubno, że tyż takigo niy umi ucichtować. Zaroz mu sie weselij zrobiyło i drab wszystko pojon. Hajnelow trownik wyglondoł choby okopy na nim kopali, jedna przi drugij kretowina usypano, a co jedna, to wiynkszo.– Widzisz! Niy trza sie naśmiywać z bergmanki, krety wiedzom, kaj majom ryć. Kret „kretowi” niy zrobi krziwdy i w mojij zegrodzie niy widać ani jednyj kretowiny.– Niy słuchej go Hajnel! – odzywo sie Lyjna, kero prawie prziszła po trocha pietruszki do zegrody i przisłuchuje sie tyj godce. – Kosiarka nowo my kupiyli i spytej sie go zaroz, czy sie fajnie niom kosi, psinco wiy, bo yno jo i synek trowa koszymy, a łon przidzie ze szychty, obiod zjy, fons utrze i zaroz na piwo do szynku wali. A czym jo wygnała krety ze zegrody, to ci zaroz powiym. Widzioł żeś przeca, wiela my tu mieli tych propelokow nastawianych i flaszek po wodzie mineralnyj na drotach. Trzaskało to i romplowało i na wiela sie niy zdało. Na chwila sie straciyły i poszły do ciebie, ale jak żeś ta twoja spalinowa puściył, to zaś były nazod. Nawet łepy ze śledziow żech im do dziur wstyrkała, bo doradziyła mi jedna baba ze Zamysłowa, ale tyż sie niy wylynkały. Dopiyro jak żech im puściyła muzyczka, to sie okozało, że krety niy som muzykalne. Pamiyntosz te kartki, co grajom, a kere kiejsik posyłali nom wszyjscy z rajchu na urodziny? Jo ich znojdła cołko kupa w szuflodzie. Wraziyłach do kretowiny otwarto i godom słuchejcie kreciki teraz „Happy byzdej tuju!”. Jedna karta grała trzi dni.Jutro ci Lyjna bomboniyra prziniesa za dorada, jo tyż kajś mom taki kartki grajonce, ale misiezdo z kolyndami, to niy wiym, czy sie im niy spodobajom i zostanom do Wilije.UTOPEK
Komentarze