Za bajtla to my sie doczekać niy poradziyli, żeby tego strzylanio posłuchać abo tyż samymu próbować se postrzylać. Nikerzi to już we Wilijo strzylali czym popadnie. Nojbardzij przijynte było strzylanie karbitym, bo przeca tych raket wtedy niy było. Mało kto mioł dostymp do prochu, zaś do karbitu to wszyjscy mieli dostymp, bo przeca na grubach świycili karbitkami, a i w chałupach po wsiach tyż nimi świycili, bo niy wszyndy sztrom wtedy mieli.Brało sie blaszano putnia po lakfarbie abo po inkszych chymikaliach, jak dejmy na to pasta do delowki. W dynku tyj biksy robiyło sie mało dziura gwoździym, do pojstrzodka sie wciepało pora bryłek karbitu, potym sie na niego napluło, deklym zatkało i stykło podpolić sztrajcheclym przez ta dziurka w dnie. Huk był diobelski, a dekel za kożdym razym lecioł daleko i niyroz go znojść niy szło. Nikerzi mieli wielkie, piyńćlitrowe biksy, te były najgłośniyjsze, w oknach szyby brzynczały od tego grubego klanku. Jeszcze inksi strzylali patyntowkami, ale to było fest oszydliwe, bo szplitry ze szkła furgały na wszyski strony. Tyż sie wciepowało bryłka karbitu do takij flaszki, w keryj na dnie była woda, gibko sie tyn patyntszlos zawrziło i trza było fronknońć tom patyntowkom do jakiś dziury w ziymi, żeby szplitrym niy dostać. To waliło choby handgranata. Nojlepij jak tyż moj kamrat Ziga chcioł se postrzylać w sylwestra, a ni mioł czym. Szpanowało go to jak diosi, bo na wsi dookoła było słychać strzylani. Wzion se Ziga do gorści porządne kneblisko i z cołkij siły rombnył nim w dźwiyrze od haźla. Głos to dało niyziymski, ale yno jedyn roz, bo w haźlu prawie jego starzik siedzioł i jak dopod potym Zigi, to larmo było na wsi wiynksze niż z tego jego trzaskanio kneblym po haźlowych dźwiyrzach.UTOPEK
Komentarze