Niy przezywej na energetyka, bo przeca za to ni mogom. Śnieg na pewno oblepiył izolatory i zrobiył sie kurtszlus, zicherongi wydmuchło i fertik! No ale baba swoji, bo przeca wiela tych seriali leci w telewizorze, to wszystko musi widzieć, że sie tak niy potraci z tymi bohaterami, bo mie sie wszystko myli i potym jom nerwuja, jak sie pytom, czy ta Małgosia już wziyna szajdong z tym Burskim.Jakoś świyczka my znojdli i już sie weselij zrobiyło w izbie, ale że niy było co robić, dali my sie do godki. Wroz sie okozało, że tela momy do pogodanio i powspominanio, a kej nedy jakoś chodzymy kole siebie i tak choby my sie niy znali i godomy po połsłowkach. Styknie sztrom wyłonczyć i już niy ci sami ludzie. Zaczli my se wspominać, jak tyż kiedyś było piyknie, chocioż sztromu ludzie ni mieli. Niy było telewizorow, radiow i inkszych klamorow, kere nom teraz czas zeżyrajom, a ludzie umieli sie obyńść bez tego. Świyciło sie czym popadnie: petronelkom, karbitkom czy tyż świyczkom, ale mieli wtedy wiyncyj czasu do siebie i wiyncyj ze sobom rozprowiali. Dziecka słuchały opowiostek, kere im starki i mamulki opowiadały, abo tyż czytały dycko bojki przed spaniym. Ogiyń sie polił w kachloku abo w żeleźnioku, ciepło było jakiś inksze, no i szło sie do kachloka przitulić, żeby sie gibko ogrzoć. Dzisioj do tych kaloryferow to sie ani przitulić niy idzie. Sztrom wyłonczony, to ani bardzo niy grzejom, bo to wszystko jakiś nowoczesne z plompkami i inkszymi fizymatyntami. Telefoniyrować tyż niy idzie, bo telefon bezprzewodowy i bez sztromu niy funguje. Dziwom sie tak na połka, na keryj stoji stary telefon, taki na kurbla, i godom do baby: – Co byś zrobiła, jakby tak teraz tyn telefon zadzwoniył?– Chyba by mie szlag trefiył – odpedziała, bo kaj tyż by mog zadzwonić, ani drotow ni mo podłonczonych, chyba by jaki duch musioł nas postraszyć. Ledwo to pedziała, oba my skoczyli na rowne nogi, bo komorka zaczła butlować, dziołcha z Krakowa prawie zadzwoniła i pyto się, co bydymy mieli na wieczerzo. – Ja, dzisioj mie tata zaprosił na wieczerzo ze świyczkami – odpedziała moja ślubno – a jeść bydymy coś specjalnego, coś, na co my downo smak mieli, bratkartofle z kiszkom.UTOPEK
Komentarze