Rechtory na swojim biurku mieli dwa taki kałamarze, bo w jednym była zwykło tinta, zaś w drugim – czerwono, kerom poprawiali nasze błyndy i stawiali ocyny.Teroz tak wszystko poszło naprzod, że ludzie wolom na komputerach pisać i potym se yno wydrukować. Kto by tam dzisioj listy pisoł, do koperty wstyrkoł, znaczki lepił i do skrzinki wciepowoł, jak idzie to posłać elektronicznie abo tyż wyklupać na komorce. Kożdy prawie mo telefon i idzie to roz-dwa załatwić. Jakby niy te urzyndowe listy, toby dzisioj listonosze niy mieli co po chałupach roznosić. Nawet kartek świontecznych coroz mynij ludzie posyłajom.A co to kiedyś była za uciecha list dostać od briftrejgra, taki z piyknym znaczkiym. Wiela razy sie czekało z niyciyrpliwościom na list od krewnych z zagranicy. Taki list mioł serce i dusza. Wiela razy synek w wojsku płakoł przi czytaniu listu z domu od mamulki, a wiela razy taki list wonioł parfinym od lipsty i chowało sie go choby jaki skarb.No ja, świat idzie naprzod i trzeba sie do tyj techniki przibadać. A teroz poszukom mojigo starego filoka ze złotym piorym i chytom sie szkryflanio listu do tyj staryj znajomyj znad morza.UTOPEK
Komentarze