– Na toć to prowda synku, to było rychtyk przeżycie, kerego sie niy do zapomnieć. W 1952 roku jak żech wyszoł ze szkoły, to żech sie zapisoł do Liceum Ogólnokształcącego w Rybniku na ulicy Kościuszki i w 1956roku zdowali my matura. Prawie teraz w maju pizła 50. rocznica, toż zorganizowali my se zjazd absolwyntow. W sobota 20 maja zebrali my sie przed połedniym na placu przed starym kosciołym, a zeszło sie nas tam przeszło trzidziestu, bo to dwie klasy były z tego rocznika. Co to śmiychu było przi tym witaniu, bo nikerzi sie bez te cołki 50 lot wcale niy widzieli i potym wszyjscy my sie na nowo poznowali i miana przipominali. Co jedyn bardzij łysy i siwy, ale humoru żodnymu niy szło ujońć. Potym my poszli na mszo do tyj kaplice akadymickij na tyj gorce przi ulicy Glywickij. Jest to najstarszy obiekt sakralny w naszym mieście. Mszo była w intyncji niyżyjoncych już naszych wychowawcow, rechtorow i poru naszych kamratow, kerych już tyż ni ma miyndzy nami. Odprawioł nom ksiondz Michał Anderko i tak piykne kozanie nom wygłosiył o przemijaniu czasu, że downo takigo żech niy słyszoł, szło by słuchać i słuchać. Słowo Boże czytoł jedyn z nas. A wiysz, jak my wszyjscy śpiywali i to bez organow, a jak nom to wychodziyło, choby my lata ze sobom trynowali. Ksiondz pedzioł, że mu sie zaroz przipomniało syminarium, bo same chopy yno byli w kościele, ani jednego babskigo głosu niy było słychać. Musisz wiedzieć, że w tych latach synki chodzili osobno i te gimnazjum przi ul. Kościuszki było yno dlo chopcow i nawet w nazwie było liceum mynskie, zaś dziołchy chodziły do tyj „piontki” przi dzisiejszyj bazylice. Ty sie możesz z tego śmioć, ale tak było, a wy dzisioj chodzicie do kupy z dziołchami i potym zamiast sie uczyć patrzycie zolyt.Po tyj mszy zaszli my wszyjscy odwiedzić ta nasza staro buda przi ul. Kościuszki. Już na placu sie miynko robiyło, jak kożdy yno głowa do gory dźwigoł, żeby sie podziwać na drugi sztok, na te trzi okna z naszyj klasy. Tam na wiyrchu posiodali my do ławek, a jedyn profesor, ale już młodszy od nas, przinios dziynnik z jedynostyj klasy i sprawdziył obecność.Po tym wszystkim posiodali my do autokow i pojechali do Ustronia, kaj mieli my wynajynte izby w domu wczasowym ze spaniym. Tam my mieli czas cołko noc i wspominaniu tych szkolnych lot niy było końca.Nikerzi sie tak rozgodali, że im ciepłyj wody brakło i musieli sie w zimnyj kompać, ale było tak miło i wesoło, że rojmatyka żodnego niy smogła.UTOPEK
Komentarze