Wywczasy

– Na toć mom synku! Ale czy jo sie tam znom na morszczokach.– To ni ma żodyn morszczok, yno świnka morsko.– Dlo mie to zawsze jest morszczok, bo ujec Zefek je dycko chowoł i tak na nie godoł, jak my za bajtli do niego prziszli.To kaj to jedziecie na te wywczasy?– Do Chorwacje starziku, bo nad naszym morzym jest rostomajncie, roz pogoda, a roz zimno, czy to idzie upasować? Tam przinajmnij jest cołki lato fajnie i ciepło.– No ja, za mojich czasow to se niy szło pozwolić na taki wywczasy zagraniczne.– To żeście ze starkom w doma siedzieli?– Kaj tam, tyż my jeździyli, ale yno w Polsce. Przeważnie na Mazury abo tyż nad morze i nigdy my niy chalatali, że pogody ni ma. My se jom sami zrobiyli i wszyjscy byli zadowoloni. Teraz, jak patrza na te mistrzostwa świata we fuzbalu, to mi sie jedne wczasy w 1974 roku przipominajom.Wyjechali my w sztyry syrynki, jedna puklato warszawa i jedna skoda M-biczka. Ale to były wywczasy, takich przigod to wy na pewno niy przeżyjecie. Wyjechali my wszyjscy spod rybnickigo banhowu, kaj my sie umowiyli o trzecij nad ranym. Łostatni przijechoł, jak dycko Hajnel tom swojom nowom skodom, bo jego baba mo tako ruła, że sie niy poradziyła spakować na czas. A wtedy kożdy broł ze sobom wszystko, nawet garce na warzynie i krauzy z jodłym, taki były czasy.Ziga mioł tak obladowano ta swoja syryna, że te zadni lapy po ziymi darły i iskry sie za nim suły jak auspufym, kaj przitarł na jakij muldzie. Puściyli my go na przodek, bo uznali wszyjscy, że najpomalij pojedzie i bydzie prowadziył. Jeszcze my wszyjscy bagażniki na dachach mieli, bo nojwiyncyj placu te łoklane celty miejsca zajmowały.Za Czynstochowom zigowo syryna zaczła kopcić i zgrzitać, aż w końcu stanyła na dobre. Cołko kolumna aut stanyła za nim i fertik, dalij niy pojedzie, bo wał korbowy sie rozlecioł. Uradziyli my, że drugi Hajnel, tyn od Rynaty, kery mioł najnowszo syryna, zostanie śnim i pojadom do Czynstochowy poszukać wału w jakim TOS-ie i sami go przeciepnom u chopa w stodole, kaj my ta uszkodzono syrynka zaciśli. Baby i dzieci zostały śnimi, bo przodzi chcieli my ich pozbiyrać do naszych aut, kto tam mioł jeszcze plac, ale Gerda z Rynatom uznały, że zostanom ze swojimi chopami, bo kto wiy, czy sie to udo zrobić. Pożegnali my sie i w sztyry auta jadymy na te Mazury, a żol nom było ich jak diobli.Cdn. UTOPEK